ரஷ்யா மற்றும் உக்ரைன் இடையிலான போரை முடிவுக்குக் கொண்டுவருவதற்காக, வெறும் அமைதிப் பரிந்துரைகளை வழங்குவதோடு நிறுத்திக்கொள்ளாமல், அமைதி முயற்சிகளில் இந்தியா சற்று ஆழமாக ஈடுபட்டுள்ளதாக இந்திய வெளியுறவுத் துறை அமைச்சர் எஸ். ஜெய்சங்கர் தெரிவித்துள்ளார்.
இதற்காகப் போரில் ஈடுபட்டுள்ள இரு நாடுகளுடனும் புதுடெல்லி தீவிர பேச்சுவார்த்தைகளை நடத்தி வருவதாகவும் அவர் வெளிப்படுத்தியுள்ளார்.
புதுடெல்லியில் நடைபெற்ற முனிச் தலைவர்கள் கூட்டத்தில் (Munich Leaders’ Meeting) கலந்துகொண்டு உரையாற்றும் போதே, அமைச்சர் ஜெய்சங்கர் இந்த விவரங்களை வெளியிட்டார்.
போரை முடிவுக்குக் கொண்டுவர இந்தியா முன்வைத்த அமைதித் திட்டம் மிகவும் விரிவானது என உக்ரைனிய வெளியுறவு அமைச்சர் அந்த்ரி சிபிஹா (Andrii Sybiha) தெரிவித்திருந்த நிலையிலேயே ஜெய்சங்கரின் இந்த அறிவிப்பு வெளியாகியுள்ளது.
கருங்கடல் வழியிலான பாதுகாப்பான கப்பல் போக்குவரத்து, தானிய ஏற்றுமதி, எரிபொருள் விநியோகம் மற்றும் தாக்குதல்களைத் தவிர்ப்பதற்கான சாத்தியக்கூறுகள் போன்ற உடனடிப் பிரச்சினைகள் குறித்தும் இரு நாடுகளுடனும் இந்தியா தொடர்ந்து பேசி வருவதாக ஜெய்சங்கர் குறிப்பிட்டார்.
ரஷ்யாவுடனான வரலாற்று ரீதியிலான உறவு குறித்துப் பேசிய அவர், 1950களிலிருந்தே இரு நாடுகளுக்கும் இடையே நெருங்கிய உறவு நிலவி வருவதாகச் சுட்டிக்காட்டினார்.
இந்தியாவின் பாதுகாப்பு மற்றும் பிராந்திய ஒருமைப்பாட்டிற்கு அச்சுறுத்தல் ஏற்பட்ட காலங்களில் சோவியத் ஒன்றியமும் ரஷ்யாவும் இந்தியாவின் பக்கம் உறுதியாக நின்ற வரலாற்றுச் சான்றுகளை இந்தியா மறந்துவிட முடியாது என அவர் வலியுறுத்தினார்.
தற்போதைய காலகட்டத்தில் ரஷ்யாவுடனான இந்தியாவின் உறவு வெறும் ராணுவம், அணுசக்தி மற்றும் விண்வெளித் துறைகளோடு மட்டும் நின்றுவிடாமல், பொருளாதார வர்த்தகம் மற்றும் எரிசக்தித் தேவைகள் வரை விரிவடைந்துள்ளதாக, ஜெய்சங்கர் தெரிவித்தார்.
சர்வதேச சூழலுக்கு ஏற்ப ஒவ்வொரு நாடும் தனது சொந்த அனுபவங்களின் அடிப்படையிலேயே பிற நாடுகளுடனான உறவைத் தீர்மானிக்கும் என்றும், ரஷ்யாவுடனான இந்தியாவின் அனுபவம் எப்போதும் நேர்மறையானதாகவே இருந்துள்ளதாகவும் இந்திய வெளியுறவுத் துறை அமைச்சர் எஸ். ஜெய்சங்கர் தெளிவுபடுத்தியுள்ளார்.
