கியூபெக்கின் முன்னணி தொழிலதிபர்கள் சிலர், அடுத்ததாக ஆட்சிக்கு வரும் அரசாங்கம் மாகாணத்தின் பொருளாதார வளர்ச்சியை மேலும் ஊக்குவிக்க வேண்டும் என அரசியல் கட்சிகளிடம் கோரிக்கை விடுத்துள்ளனர்.
மொன்றியலில் நடைபெற்ற தொழில்முனைவோர் கூட்டத்தில் நூற்றுக்கணக்கானோர் கலந்துகொண்ட நிலையில், Groupe Dynamite நிறுவனத்தின் தலைமை நிர்வாக அதிகாரி Andrew Lutfy, கியூபெக் மக்கள் இனியும் தோல்விகளை ஏற்றுக்கொள்ள விரும்பவில்லை என்ற செய்தியை அரசியல் கட்சிகளுக்கு வழங்க வேண்டும் என தெரிவித்தார்.
கியூபெக் தற்போது முதலீடுகளுக்கு ஏற்ற இடமாக இல்லை என்றும் அவர் விமர்சித்துள்ளார். மேலும், தொழில் செய்வதற்கு அதிக கட்டுப்பாடுகள் கொண்ட மாகாணமாக கியூபெக் இருப்பதாகவும் Andrew Lutfy தெரிவித்துள்ளார்.
இந்தக் கருத்துக்களுடன் Couche-Tard நிறுவனத்தின் இணை நிறுவனர் Alain Bouchard உள்ளிட்ட பல தொழிலதிபர்களும் இணைந்துள்ளனர்.
அமெரிக்காவின் மாநிலங்களையும் கனடாவின் ஏனைய மாகாணங்களையும் ஒப்பிடும்போது, தனிநபர் அடிப்படையிலான மொத்த உள்நாட்டு உற்பத்தி மற்றும் வாங்கும் திறன் ஆகியவற்றில் கியூபெக் கீழ்நிலையில் இருப்பதாக அவர்கள் கூறுகின்றனர்.
பொருளாதார நிபுணர் Moshe Lander, கியூபெக்கில் அதிகளவான விதிமுறைகள் மற்றும் அரசாங்கக் கட்டுப்பாடுகள் இருப்பது இதற்கு ஒரு காரணமாக இருக்கலாம் என தெரிவித்துள்ளார்.
பொருளாதார வளர்ச்சிக்கு தடையாக இருக்கும் காரணிகளை அடுத்த அரசாங்கம் அகற்ற வேண்டும் என்பதே தொழில்துறை தலைவர்களின் கோரிக்கையாக உள்ளது.
எனினும், அந்தத் தடைகள் என்ன என்பதை அவர்கள் குறிப்பாக விளக்கவில்லை.
கியூபெக் மக்கள் தேர்தலுக்கு இன்னும் மூன்று நாட்களே இருக்கும் நிலையில், பிரிவினை தொடர்பான referendum குறித்த விவாதங்களும் இடம்பெற்று வருகின்றன.
இந்த அரசியல் நிலைமைகள் பல நிறுவனங்களுக்கு நிச்சயமற்ற சூழலை உருவாக்கக்கூடும் என Moshe Lander தெரிவித்துள்ளார். தொழில் நிறுவனங்களுக்கு நிச்சயமற்ற தன்மை சாதகமானது அல்ல என்றும், மொழி மற்றும் கலாசாரத்தைச் சுற்றியுள்ள சில கியூபெக் கொள்கைகள் நிறுவனங்களுக்கு சவாலாக இருக்கக்கூடும் என்றும் அவர் குறிப்பிட்டுள்ளார்.
