கனடிய பாதுகாப்பு மற்றும் உளவுத்துறை சேவை (CSIS) நிறுவனம், தகவல்களைச் சேகரிப்பதற்காகத் தனக்கு வழங்கப்பட்டுள்ள சிறப்பு அதிகாரங்களைப் பயன்படுத்தியபோது சட்ட விதிமுறைகளை முறையாகப் பின்பற்றத் தவறியிருக்கலாம் எனத் தெரிவிக்கப்பட்டுள்ளது.
தேசிய பாதுகாப்பு மற்றும் உளவுத்துறை கண்காணிப்பு முகவரகம் (NSIRA) வெளியிட்டுள்ள புதிய அறிக்கையில் இந்தத் தகவல் சுட்டிக்காட்டப்பட்டுள்ளது.
கனடிய உளவுத்துறைச் சட்டத்தின்படி (CSIS Act), புலனாய்வு நடவடிக்கைகளின் போது சட்டச் சிக்கல்கள் ஏற்படுவதைத் தவிர்க்கும் வகையில், அங்கீகரிக்கப்பட்ட உளவுத்துறை ஊழியர்கள் சில குறிப்பிட்ட குற்றச் செயல்களில் ஈடுபட அனுமதி வழங்கப்பட்டுள்ளது.
எனினும், இந்த அதிகாரத்தைப் பயன்படுத்துவதற்குச் கடுமையான சட்டக் கட்டுப்பாடுகளும் நடைமுறைகளும் காணப்படுகின்றன.
2022 மற்றும் 2023 ஆம் ஆண்டுகளில் மேற்கொள்ளப்பட்ட உளவுத்துறை நடவடிக்கைகளை ஆய்வு செய்த கண்காணிப்புக் குழு, அனுமதிக்கப்பட்ட குற்றங்களின் வகைகளில் உளவு அமைப்பு விதிமுறைகளைப் பின்பற்றியிருந்த போதிலும், சில முக்கிய நடைமுறை மீறல்கள் இடம்பெற்றுள்ளதாகத் தெரிவித்துள்ளது.
குறிப்பாக, உரிய சட்டப்பூர்வ நியமனம் பெறாத சில ஊழியர்கள் குற்றச் செயல்களில் ஈடுபட்டிருக்கலாம் என்றும், சட்டப்படி பெறப்பட வேண்டிய உயர் அதிகாரிகளின் முன்அனுமதியின்றி பிறரைச் சில செயல்களைச் செய்யப் பணித்திருக்கலாம் என்றும் அந்த அறிக்கை சுட்டிக்காட்டுகிறது.
அத்துடன், இத்தகைய விசேட அதிகாரங்களைப் பயன்படுத்துவதற்கான நியாயமான காரணங்களைச் சரியாக ஆவணப்படுத்துவதற்கு, கனடிய பாதுகாப்பு மற்றும் உளவுத்துறை சேவை அமைப்பு தவறியுள்ளதாகவும் கூறப்பட்டுள்ளது.
