கனடாவுடனான வர்த்தகப் போரை மேலும் தீவிரப்படுத்தும் வகையில், கனடாவில் இருந்து இறக்குமதி செய்யப்படும் குறிப்பிட்ட சில பொருட்களுக்கு விதிக்கப்பட்ட முழுமையான தடை உத்தரவை அமெரிக்க அதிபர் டொனால்ட் ட்ரம்ப் தலைமையிலான வெள்ளை மாளிகை நிர்வாகம் அமுல்படுத்தியுள்ளது.
இத்தடை உத்தரவின் கீழ் கனடிய மதுபானங்கள், மோட்டார் சைக்கிள்கள், பால் உப பொருட்களான ‘வே’ (Whey) மற்றும் கரும்பு வெல்லப் பாகு (Molasses) உள்ளிட்ட பல அத்தியாவசியப் பொருட்கள் அமெரிக்க சந்தைக்குள் நுழைவது முற்றாகத் தடை செய்யப்பட்டுள்ளது. இரு நாடுகளுக்கும் இடையே கடந்த 18 மாதங்களுக்கும் மேலாக நீடித்து வரும் வர்த்தகத் தகராறு மற்றும் பரஸ்பர வரி விதிப்பு நடவடிக்கைகளின் தொடர்ச்சியாகவே இப்புதிய தடை அமலுக்கு வந்துள்ளது.
கனடா அரசு முன்னதாக அமெரிக்கப் பொருட்களுக்கு 50 சதவீத கூடுதல் வரி விதித்ததற்குப் பதிலடி கொடுக்கும் வகையிலேயே, அமெரிக்கா இந்தத் தீவிரமான நடவடிக்கையை எடுத்திருப்பதாக தெரிவிக்கப்படுகிறது. இந்தத் தடையின் கீழ் பீர், வைன், விஸ்கி, ரம், ஜின், வோட்கா, பிராந்தி மற்றும் பிராந்திய வகை மதுபானங்கள் அனைத்தும் அமெரிக்க இறக்குமதிப் பட்டியலிலிருந்து நீக்கப்பட்டுள்ளன.
அத்துடன், கியூபெக் மாகாணத்தை மையமாகக் கொண்டு உற்பத்தி செய்யப்படும் பிரபல பி.ஆர்.பி (BRP Inc.) நிறுவனத்தின் கேன்-அம் ஸ்பைடர்(Can-Am Spyder) போன்ற மோட்டார் சைக்கிள் ஏற்றுமதியும் இதில் நேரடியாகப் பாதிக்கப்பட்டுள்ளது.
தேசிய அளவில் கனடாவின் ஒட்டுமொத்தப் பொருளாதாரத்தைப் பெரிய அளவில் இந்தத் தடை பாதிக்காது என பொருளாதார வல்லுநர்கள் கணித்துள்ள போதிலும், குறிப்பிட்ட உற்பத்தித் துறைகளில் இயங்கி வரும் நிறுவனங்களுக்கும் வணிகங்களுக்கும் இது மீள முடியாத பெரும் இழப்பை ஏற்படுத்தும் என்று தெரிவிக்கப்பட்டுள்ளது.
ஏற்கனவே, இரு நாடுகளுக்கும் இடையே பில்லியன் கணக்கிலான டொலர்கள் மதிப்பிலான ஏற்றுமதிப் பொருட்களுக்குக் கடுமையான வரிகள் விதிக்கப்பட்டுள்ள நிலையில், அமெரிக்காவில் தங்களது உள்நாட்டு உற்பத்தியாளர்களைப் பாதுகாப்பதாகக் கூறியும், சர்க்கரை மற்றும் பால் துறைச் சந்தைப் போட்டிகளை முன்னிறுத்தியும் வெள்ளை மாளிகை இத்தகைய அதிரடித் தடையை அமல்படுத்தியுள்ளது.
