மொன்றியல் மெட்ரோ இரயில் அமைப்பின் நீல நிறப் பாதை (Blue Line) விரிவாக்கக் கட்டுமானப் பணியிடங்களில், வெறும் மூன்று நாட்களுக்குள் அடுத்தடுத்து நடைபெற்ற இருவேறு விபத்துகளில் இரண்டு தொழிலாளர்கள் தீவிர காயமடைந்து மருத்துவமனையில் அனுமதிக்கப்பட்டுள்ளதாகத் தொழிற்சங்கம் தகவல் வெளியிட்டுள்ளது.
நிலத்தடி அகழ்வாராய்ச்சி மற்றும் கட்டுமானப் பணிகள் தீவிரமாக நடைபெற்று வரும் சூழலில், அடுத்தடுத்து நிகழ்ந்துள்ள இந்த விபத்துகள், கியூபெக் மாகாணத்தில் தொழிலாளர்களின் பாதுகாப்பு குறித்த பெரும் கேள்விகளையும் அச்சத்தையும் எழுப்பியுள்ளன.
தொழிற்சங்கப் பிரதிநிதிகள் அளித்துள்ள தகவல்களின்படி, முதல் விபத்து சில நாட்களுக்கு முன்னர் கட்டுமானக் தளத்தில் கனரக இயந்திரங்கள் மற்றும் உபகரணங்களைக் கையாளும்போது நிகழ்ந்துள்ளது.
இதில் பணியில் ஈடுபட்டிருந்த தொழிலாளி ஒருவர் பலத்த காயமடைந்து அவசர சிகிச்சைப் பிரிவில் அனுமதிக்கப்பட்டார்.
இதனைத் தொடர்ந்து, அடுத்த மூன்றாவது நாளில் அதே நீல நிறப் பாதை விரிவாக்கத் திட்டத்தின் மற்றொரு பகுதியில் நிகழ்ந்த இரண்டாவது விபத்தில், மேலும் ஒரு தொழிலாளி படுகாயமடைந்தார்.
காயமடைந்த இருவரும் உடனடியாக மீட்புக் குழுவினரால் மீட்கப்பட்டு மருத்துவமனைக்குக் கொண்டு செல்லப்பட்டனர்.
மொன்றியல் நகரின் மிக முக்கியப் போக்குவரத்துத் திட்டங்களில் ஒன்றாகக் கருதப்படும் இந்த நீல நிறப் பாதை விரிவாக்கப் பணியில், பாதுகாப்பு நடைமுறைகள் பலப்படுத்தப்படும் வரை, குறிப்பிட்ட சில ஆபத்தான பணிகளைத் தற்காலிகமாக நிறுத்தி வைக்க வேண்டும் என்றும் தொழிற்சங்கங்கள் கோரிக்கை விடுத்துள்ளன.
