ஏயர் கனடா (Air Canada) விமான நிறுவனத்தின் புதிய தலைமை நிர்வாக அதிகாரியாகப் (CEO) பொறுப்பேற்கவுள்ள அங்கோ வான் டெர் வெர்ஃப் (Anko van der Werff) தலைமை வகிக்கும் தற்போதைய விமான நிறுவனத்தில், தொழிலாளர் உரிமைகளுக்கு எதிரான மற்றும் பழிவாங்கும் நடவடிக்கைகள் முன்னெடுக்கப்பட்டு வருவதாக, கனடிய விமானிகள் தொழிற்சங்கம் குற்றம்சாட்டியுள்ளது.
தற்போது ஸ்காண்டிநேவியன் ஏயர்லைன்ஸ் (Scandinavian Airlines – SAS) நிறுவனத்தின் தலைமை நிர்வாகியாகச் பணியாற்றி வரும் வான் டெர் வெர்ஃப், எதிர்வரும் ஜனவரி மாதத்திற்குள் ஏயர் கனடா நிறுவனத்தின் புதிய தலைமைப் பொறுப்பை ஏற்கவுள்ளார்.
இந்நிலையில், அவரது தற்போதைய நிர்வாகத்தின் கீழ் இடம்பெற்றுள்ள தொழிலாளர் பணிநீக்கம் தொடர்பான சம்பவம், ஏயர் கனடா ஊழியர்கள் மத்தியில் பெரும் கவலையையும் அச்சத்தையும் தோற்றுவித்துள்ளது.
கனடிய சர்வதேச விமானிகள் சங்கத்தின் (ALPA Canada) தலைவர் டிம் பெர்ரி (Tim Perry), வான் டெர் வெர்ஃப்பிற்கு அனுப்பியுள்ள கடிதத்தில், ஸ்காண்டிநேவியன் ஏயர்லைன்ஸ் நிறுவனத்தில் தொழிற்சங்கத் தலைவர் ஒருவர் நியாயமின்றிப் பணிநீக்கம் செய்யப்பட்ட சம்பவத்தைச் சுட்டிக்காட்டியுள்ளார்.
ஸ்காண்டிநேவியன் ஏயர்லைன்ஸ் நிறுவனத்தின் விமானிகள் சங்கத் தலைவரான கென்ட் தியேல் (Kent Thiel) என்பவர், தொலைதூரப் பணியில் (Remote work) இருந்தபோது வெளிநாட்டுக்குச் சென்றார் என்ற காரணத்தைக் கூறி, ஓகஸ்ட் மாத இறுதியில் பணிநீக்கம் செய்யப்பட்டார்.
ஆனால், அவர் தொழிற்சங்கப் பணிகளுக்காகவே பயணித்தார் எனவும், இந்த நடவடிக்கை அப்பட்டமான தொழிற்சங்கப் பழிவாங்கல் என்றும் தொழிற்சங்கம் தெரிவித்துள்ளது.
