ஒன்டாரியோ மாகாணம், கெம்ப்ட்வில் (Kemptville) பகுதியில் இரண்டு பயணியர் வாகனங்கள் நேருக்கு நேர் மோதி இடம்பெற்ற வீதி விபத்தில் ஒருவர் உயிரிழந்துள்ளதுடன், மேலும் ஐவர் காயமடைந்து மருத்துவமனையில் அனுமதிக்கப்பட்டுள்ளனர்.
காயமடைந்தவர்களில் மூவரின் நிலைமை மிகவும் கவலைக்கிடமாக உள்ளதாக பொலிஸாரும் அவசர உதவிச் சேவையினரும் தெரிவித்துள்ளனர்.
கெம்ப்ட்வில் பகுதிக்கு அருகாமையிலுள்ள ‘கவுண்டி வீதி 44’ (County Road 44) பாதையில், பீச் வீதிக்கு (Beach Road) சற்று வடக்கே இந்த விபத்து சம்பவித்துள்ளது.
விபத்து குறித்து தகவலறிந்த லீட்ஸ் கிரென்வில் (Leeds Grenville) பாராமெடிக்கல் சேவையின் துணைப் பணிப்பாளர் ஜொனாதன் சில்வெஸ்டர் (Jonathan Sylvester) தெரிவிக்கையில், விபத்தில் காயமடைந்த ஆறு பேரில் ஒருவர் விமான ஆம்புலன்ஸ் (Air Ambulance) மூலமாகவும், ஏனையோர் தரைவழி ஆம்புலன்ஸ் மூலமாகவும் ஒட்டாவா மருத்துவமனையின் ‘சிவிக்’ (Civic) வளாகத்திற்கு உடனடியாகக் கொண்டு செல்லப்பட்டனர் எனக் குறிப்பிட்டார்.
அங்கு சிகிச்சையளிக்கப்பட்ட போதிலும், பலத்த காயமடைந்த நபர் ஒருவர் சிகிச்சை பலனின்றி உயிரிழந்ததாக ஒன்டாரியோ மாகாணப் பொலிஸின் (OPP) சார்ஜென்ட் எரின் கிரான்டன் (Erin Cranton) உறுதிப் படுத்தியுள்ளார்
விபத்துக்கான துல்லியமான காரணம் இதுவரை அறியப்படவில்லை என்றும், இது தொடர்பில் ஒன்டாரியோ மாகாணப் பொலிஸார் விரிவான விசாரணைகளை முன்னெடுத்து வருவதாகவும் அதிகாரப்பூர்வமாக அறிவிக்கப்பட்டுள்ளது.
