அமெரிக்காவுடனான வர்த்தகப் பதற்றம் தீவிரமடைந்து வரும் நிலையில், ஐரோப்பிய ஒன்றியத்துடன் கனடா தனது பொருளாதார மற்றும் மூலோபாய உறவுகளை மேலும் வலுப்படுத்தும் முயற்சிகளில் ஈடுபட்டுள்ளதாக தெரிவிக்கப்பட்டுள்ளது.
கனடாவை ஐரோப்பிய ஒன்றியத்தின் “Associate Member” எனப்படும் இணை உறுப்பினர் அந்தஸ்துக்கு கொண்டுவருவது தொடர்பில் பிரதமர் மார்க் கார்னி, ஐரோப்பிய நாடுகளின் தலைவர்களுடன் கலந்துரையாடி வருவதாக *Wall Street Journal* செய்தி வெளியிட்டுள்ளது.
எனினும், ஐரோப்பிய ஒன்றியத்தில் முழுமையான உறுப்பினராக இணைவது குறித்து கனடா தற்போது நடவடிக்கை எடுக்கவில்லை என தெரிவிக்கப்படுகிறது. மாறாக, வர்த்தகம், பாதுகாப்பு, எரிசக்தி, செயற்கை நுண்ணறிவு, முக்கிய கனிமங்கள் மற்றும் தொழில்நுட்பம் உள்ளிட்ட துறைகளில் ஐரோப்பாவுடன் ஆழமான ஒத்துழைப்பை ஏற்படுத்துவதே நோக்கமாகக் கருதப்படுகிறது.
அமெரிக்காவுடனான வர்த்தக உறவு கடுமையான நெருக்கடியை எதிர்கொண்டுள்ள நிலையில், கனடா தனது பொருளாதாரத்தை அமெரிக்க சந்தையை மட்டுமே சார்ந்திருப்பதிலிருந்து மாற்றி, ஐரோப்பா உள்ளிட்ட சர்வதேச சந்தைகளுடன் உறவுகளை விரிவுபடுத்துவதில் கவனம் செலுத்தி வருகிறது.
கனடா ஏற்கனவே ஐரோப்பிய ஒன்றியத்துடன் வர்த்தகம் மற்றும் பாதுகாப்பு உள்ளிட்ட பல்வேறு துறைகளில் ஒத்துழைப்பை அதிகரித்து வருகிறது. இந்த ஆண்டில் கனடா, ஐரோப்பிய ஒன்றியத்தின் பாதுகாப்பு கொள்முதல் முயற்சியான SAFE-இல் இணைந்த முதல் ஐரோப்பிய அல்லாத நாடாகவும் மாறியுள்ளது.
இந்நிலையில், கனடாவுக்கும் ஐரோப்பிய ஒன்றியத்துக்கும் இடையிலான உறவை மேலும் ஆழப்படுத்துவதற்கான புதிய வழிகள் குறித்து அடுத்த கட்டங்களில் பேச்சுவார்த்தைகள் இடம்பெறவுள்ளதாக எதிர்பார்க்கப்படுகிறது.
அமெரிக்காவுடனான வர்த்தகப் பதற்றம் தொடர்ந்து நீடித்தால், கனடாவின் வெளிநாட்டு வர்த்தக மற்றும் பொருளாதாரக் கொள்கையில் ஐரோப்பாவை நோக்கிய இந்த நகர்வு மேலும் முக்கியத்துவம் பெறும் என சர்வதேச அரசியல் மற்றும் பொருளாதார ஆய்வாளர்கள் கருதுகின்றனர்.
