மொன்றியல் மாநகரசபைக்கும், அந்நகரத்தின் உடலுழைப்பு ஊழியர்களைக் குறிக்கும் ‘நீலச் சீருடைப் பணியாளர்கள்’ (Blue-collar workers) தொழிற்சங்கத்திற்கும் இடையே புதிய கூட்டு ஒப்பந்தம் தொடர்பான முதற்கட்ட கொள்கை உடன்பாடு (Agreement in principle) எட்டப்பட்டுள்ளது.
இதனையடுத்து, இம்மாதம் 22 ஆம் திகதி தொடங்கவிருந்த ஒரு வார கால வேலைநிறுத்தப் போராட்டத்தைக் கைவிடுவதாக, அந்த தொழிற்சங்கம் அதிகாரப்பூர்வமாக அறிவித்துள்ளது.
இப்போராட்டம் கைவிடப்பட்டதன் மூலம், நகரில் தற்போது நடைபெற்று வரும் சர்வதேசப் புகழ்பெற்ற ‘UCI 2026 உலக வீதி மிதிவண்டி சாம்பியன்ஷிப்’ (UCI Road World Championships) தொடர் எவ்வித இடையூறுகளுமின்றித் தடையின்றி நடைபெறுவது உறுதிசெய்யப்பட்டுள்ளது.
சுமார் 6,600 உறுப்பினர்களைக் கொண்ட ‘CUPE 301′ தொழிற்சங்கத்தின் கூட்டு ஒப்பந்தக் காலம் கடந்த 2025 ஆம் ஆண்டு ஜனவரி 1 ஆம் திகதியுடன் முடிவடைந்தது.
புதிய ஊதிய உயர்வு, பணவீக்கத்திற்கேற்ப வேலை நிலைமைகள் மற்றும் காப்பீட்டுச் சலுகைகள் தொடர்பில் மொன்றியல் மாநகரசபை நிர்வாகத்துடன் கடந்த இரு வருடங்களாக முரண்பாடுகள் நீடித்து வந்தன.
இந்நிலையிலேயே, நடுவர் முன்னிலையில் தொடர்ச்சியாக இடம்பெற்ற எட்டு நாள் தீவிரப் பேச்சுவார்த்தைகளின் முடிவில், இரு தரப்பிற்கும் இடையே சுமுக உடன்பாடு எட்டப்பட்டுள்ளது.
