மத்திய கிழக்கில் தொடர்ந்து நீடித்து வரும் போர்ப் பதற்றத்திற்கு நடுவே, உலகளவில் வர்த்தக ரீதியாக மிக முக்கியமான கடல்வழியாகத் திகழும் ஹார்முஸ் நீரிணையை மீண்டும் கப்பல் போக்குவரத்திற்காகத் திறக்க ஈரான் தனது நிபந்தனைப் பட்டியலை வெளியிட்டுள்ளது.
ஓமன் நாட்டின் மத்தியஸ்தத்தில் நடத்தப்பட்ட உயர்மட்டப் பேச்சுவார்த்தையைத் தொடர்ந்து, வணிகக் கப்பல்களின் பாதுகாப்பான பயணத்திற்காக ஓமன் கடல் பகுதியையும் ஈரான் கடல் எல்லையையும் இணைத்து புதிய தற்காலிக பாதை ஒன்றை உருவாக்க முதற்கட்ட உடன்பாடு எட்டப்பட்டுள்ளது.
இந்த நீர்வழிப் பாதையின் கட்டுப்பாடுகள் மற்றும் அதன் மூலம் கிடைக்கும் வருவாயைப் பகிர்ந்து கொள்வது தொடர்பாக ஈரானும் ஓமனும் உடன்பட்டுள்ள வேளையில், தங்களது பிரதான நிபந்தனைகளை அமெரிக்கா ஏற்றுக் கொண்டால் மட்டுமே இத்திட்டம் செயல்பாட்டிற்கு வரும் என ஈரானின் உச்ச தேசிய பாதுகாப்பு கவுன்சில் திட்டவட்டமாகத் தெரிவித்துள்ளது.
ஈரான் துறைமுகங்கள் மீது அமெரிக்கா விதித்துள்ள கடல்வழி முற்றுகை மற்றும் பொருளாதாரத் தடைகளை உடனடியாகத் திரும்பப் பெற வேண்டும், போரினால் ஏற்பட்ட இழப்புகளுக்கு இழப்பீடு வழங்க வேண்டும், மற்றும் பிராந்தியத்தில் நடக்கும் போரை முற்றிலுமாக முடிவுக்குக் கொண்டுவர வேண்டும் என்பன உள்ளிட்ட கோரிக்கைகளை ஈரான் முன்வைத்துள்ளது.
உலகின் ஐந்தில் ஒரு பங்கு கச்சா எண்ணெய் மற்றும் திரவமாக்கப்பட்ட இயற்கை எரிவாயு கொண்டு செல்லப்படும் இந்த முக்கிய நீர்வழிப் பாதை கடந்த சில மாதங்களாக முடங்கியுள்ளதால் உலகச் சந்தையில் கடும் பொருளாதாரத் தாக்கம் ஏற்பட்டுள்ளது.
அமெரிக்கா தனது நிபந்தனைகளுக்குக் கட்டுப்பட மறுத்தால், எந்தவொரு காரணத்தைக் கொண்டும் ஹார்முஸ் நீரிணை திறக்கப்படாது என்றும், ராணுவக் கப்பல்களுக்கு இதில் பயணிக்க அனுமதியில்லை என்றும் ஈரானிய புரட்சிகரப் பாதுகாப்புப் படை எச்சரித்துள்ளது.
