நாடாளுமன்ற உறுப்பினர் ஷான் சென் (Shaun Chen), சீனாவில் சுற்றுப்பயணம் மேற்கொண்டிருந்தபோது, கனடிய நாடாளுமன்றத்தின் வாக்கெடுப்புகளில் முறைகேடாகப் பங்கேற்றதாக சமூக வலைதளங்களில் பரப்பப்பட்ட குற்றச்சாட்டுகள் முற்றிலும் ஆதாரமற்றவை என தகவல் வெளியாகியுள்ளது.
ஸ்கார்பரோ வடக்கு (Scarborough North) தொகுதியின் லிபரல் கட்சி நாடாளுமன்ற உறுப்பினர் ஷான் சென், தனது உடல்நலக் குறைவு காரணமாக செப்டெம்பர் மாதம் பதவியிலிருந்து விலகப்போவதாக அண்மையில் அறிவித்திருந்தார்.
இந்த அறிவிப்பைத் தொடர்ந்து, அவர் மார்ச் மாதத்தில் சீனாவில் இருந்தபோது, கனேடிய நாடாளுமன்றத்தின் மின்னணு வாக்கெடுப்பு முறையில் பங்கேற்றதாக சமூக வலைதளங்களில் கடுமையான விமர்சனங்கள் எழுந்தன.
அவர் சீனாவில் இருந்தபோது நாடாளுமன்றம் விடுமுறையில் இருந்தது எனவும் அந்த நாட்களில் எந்தவொரு வாக்கெடுப்பும் நடைபெறவில்லை எனவும் தற்போது உறுதிப்படுத்தப்பட்டுள்ளது.
நாடாளுமன்றத்தின் நிலைக்குழு விதிகளின்படி, நாடாளுமன்ற உறுப்பினர்கள் நாட்டின் புவியியல் எல்லைக்குள் இருக்கும்போது மட்டுமே மின்னணு முறையில் வாக்களிக்க முடியும் என்பது குறிப்பிடத்தக்கது.
