நெற்ஃபிளிக்ஸ் (Netflix) உள்ளிட்ட வெளிநாட்டு டிஜிட்டல் ஸ்ட்ரீமிங் நிறுவனங்கள் கனடியக் கலை மற்றும் கலாசாரப் படைப்புகளுக்கு நிதிப் பங்களிப்பு வழங்க வேண்டும் என்ற சட்டரீதியான நிபந்தனையை இரத்து செய்ய வேண்டாம் என, சுமார் 50 கலாசார மற்றும் கலை அமைப்புகள் பிரதமர் மார்க் கார்னிக்கு (Mark Carney) கூட்டு முறையீடு மூலம் அவசர கோரிக்கை விடுத்துள்ளன.
வெளிநாட்டு ஸ்ட்ரீமிங் நிறுவனங்கள் கனடாவில் ஈட்டும் வருவாயில் 15 சதவீதத்தை கனடிய உள்ளடக்கப் படைப்புகளுக்கு (Cancon) நிதியாக வழங்க வேண்டும் என கனடிய வானொலி, தொலைக்காட்சி மற்றும் தொலைத்தொடர்பு ஆணைக்குழு (CRTC) முன்னதாக உத்தரவிட்டிருந்தது.
இருப்பினும், வாடிக்கையாளர்களின் செலவினங்களைக் குறைக்கும் நோக்கிலும், அமெரிக்க வர்த்தக அழுத்தங்களுக்கு மத்தியிலும், இந்த விதியை நீக்கிவிட்டு அதற்குப் பதிலாக ஆண்டிற்கு 600 மில்லியன் டொலர் அரச நிதியை நேரடியாக வழங்கப் போவதாக கூட்டாட்சி அரசாங்கம் சமீபத்தில் அறிவித்தது.
இவ்வாறான அரச நிதியுதவி, சட்டரீதியாகப் பிணைக்கப்பட்ட பங்களிப்பு முறைமைக்கு ஒருபோதும் மாற்றீடாக முடியாது என சுட்டிக்காட்டி, பிரதமர் மார்க் கார்னி மற்றும் கலாசாரத் துறை அமைச்சர் மார்க் மில்லர் (Marc Miller) ஆகியோருக்கு, 50 அமைப்புகள் இணைந்து கடிதம் ஒன்றை அனுப்பியுள்ளன.
கனடிய சுயாதீன தயாரிப்பாளர்களைப் பிரதிநிதித்துவப்படுத்தும் கனடிய ஊடகத் தயாரிப்பாளர்கள் சங்கம் (CMPA), நடிகர்கள், எழுத்தாளர்கள், இயக்குநர்களின் தொழிற்சங்கங்கள் மற்றும் திரைப்பட விழா அமைப்புகளின் பிரதிநிதிகள் இந்தக் கடிதத்தில் கையெழுத்திட்டுள்ளமை குறிப்பிடத் தக்கது.
