மொன்றியல் நகரிலுள்ள ‘டோர்வால்’ (Dorval) பகுதியில் ரயில் போக்குவரத்து, பிராந்திய பொதுப்போக்குவரத்து மற்றும் விமான நிலைய பேருந்துச் சேவை ஆகியவற்றை ஒரே இடத்தில் இணைக்கும் ‘டோர்வால் பல்முனை போக்குவரத்து மையத்தின்’ இணை-மேம்பாட்டு கட்டத்தை ‘விஆ ரயில் கனடா’ (VIA Rail Canada) நிறுவனம் அதிகாரப்பூர்வமாகத் தொடங்கியுள்ளது.
மொன்றியலின் வெஸ்ட் ஐலேண்ட் (West Island) பகுதியில் அமையவுள்ள இந்த அதிநவீன போக்குவரத்து மையம், பயணிகள் மற்றும் விமானப் பயணிகளின் பயண அனுபவத்தை மேலும் இலகுவாக்கும் வகையில் வடிவமைக்கப்பட்டு வருகிறது.
தற்போதுள்ள ‘எக்சோ’ (exo) ரயில் நிலைய வளாகத்தில் உருவாக்கப்படவுள்ள இந்த புதிய ஒருங்கிணைந்த மையத்தின் மூலம் போக்குவரத்துச் சேவைகள் ஒரே கூரையின் கீழ் கொண்டுவரப்படவுள்ளன.இத்திட்டம் குறித்து கருத்து தெரிவித்துள்ள மத்திய போக்குவரத்து அமைச்சர் ஸ்டீவன் மெக்கின்னன் (Steven MacKinnon), “பயணிகள்-ரயில், பொதுப்போக்குவரத்து மற்றும் வான்வழிப் போக்குவரத்து முதலானவற்றை சிறப்பான முறையில் இணைப்பதன் மூலம், இத்திட்டம் பயணங்களின் செயல்திறனை அதிகரிப்பதுடன், அவற்றை மேலும் தடையற்றதாகவும், அணுகக்கூடியதாகவும், மாற்றும்” எனக் குறிப்பிட்டுள்ளார்.
மொன்றியல் ட்ரூடோ விமான நிலையத்திற்குச் செல்லும் பயணிகள் மற்றும் வெஸ்ட் ஐலேண்ட் வழியே பயணிக்கும் ஆயிரக்கணக்கான மக்களுக்கு இந்த புதிய போக்குவரத்து மையம் சிறந்த வசதியை ஏற்படுத்தும் என எதிர்பார்க்கப்படுகிறது.
