கடந்த மாதம் ஜந்தர் மந்தரில் நடந்த கரப்பான்பூச்சி ஜனதா கட்சியின் (சிஜேபி) போராட்டத்தின்போது பிரதமர் நரேந்திர மோடியை அவதூறாகப் பேசியதாகக் கூறப்படும் சிறுமியின் தாய், பிரதமர் தனது “மன்னிப்பின்” மூலம் தன் மகளுக்கு ஒரு “புதிய வாழ்க்கையை” வழங்கியுள்ளார் என்று கூறியுள்ளார்.
செய்தி நிறுவனம் ஒன்றிடம் பேசிய அவர், பிரதமர் மோடிக்கு தனது நன்றியைத் தெரிவித்ததோடு, தற்போது “புதிய வாழ்க்கையை” பெற்றுள்ள தேசத்தின் மகளை அவர் மன்னித்ததுதான் அவரது பெருந்தன்மை என்றும் கூறினார்.
மேலும், அவர் தனது மகளின் செயல்களுக்காக மன்னிப்புக் கோரியதோடு, அந்தச் சிறுமி மீது பதிவு செய்யப்பட்ட முதல் தகவல் அறிக்கையை (FIR) திரும்பப் பெற வேண்டும் என்றும் கோரினார்.
20 வயதுக்குட்பட்ட குழந்தைகளுக்கு ஃபேஸ்புக் மற்றும் இன்ஸ்டாகிராம் ஆகியவற்றைத் தடை செய்யுமாறு அவர் பிரதமர் மோடியிடம் வேண்டுகோள் விடுத்தார். இதற்கு எதிர்வினையாற்ற என்னிடம் வார்த்தைகள் இல்லை. இந்தக் குழந்தை மட்டுமல்ல, இந்த வயதுப் பிரிவைச் சேர்ந்த ஏறக்குறைய அனைவரும் இந்தச் சூழ்நிலையில்தான் உள்ளனர். 10 முதல் 20 வயதுக்குட்பட்ட குழந்தைகளுக்கு இன்ஸ்டாகிராம், ஃபேஸ்புக் போன்றவற்றைத் தடை செய்யுமாறு பிரதமர் மோடியிடம் நான் கேட்டுக்கொள்கிறேன். இந்தக் குழந்தைகள் படிக்க மட்டுமே அனுமதிக்கப்பட வேண்டும்.
மேலும் அவர், இதுபோன்ற போராட்டங்களில் “சிறு குழந்தைகளை” அனுமதிக்கக் கூடாது என்றும் கூறினார். “இந்தக் குழந்தைகள் தங்களுக்குச் சாதகமாகப் பயன்படுத்தப்பட்டு, எதை வேண்டுமானாலும் பேச வைக்கப்படுகிறார்கள்… அவர்களுக்கு உலகத்தைப் பற்றியும் சமூகத்தைப் பற்றியும் புரிதல் இல்லை, பெரியவர்களை எப்படி மதிக்க வேண்டும் என்பதும் தெரியாது. யாரைப் பற்றி, என்ன பேச வேண்டும், எவ்வளவு பேச வேண்டும் என்பதும் அவர்களுக்குத் தெரியாது,” என்று அவர் கூறினார்.
சமீபத்தில் அவர் மீது zero FIR பதிவு செய்யப்பட்டதைத் தொடர்ந்து, கடந்த சனிக்கிழமையன்று சமூக ஊடகங்களில் வெளியானதாகக் கூறப்படும் ஒரு காணொளியில் தனது கருத்துக்களுக்காக நொய்டாவைச் சேர்ந்த அந்தப் பெண் மன்னிப்புக் கேட்ட பிறகு இவரது கருத்துக்கள் வெளிவந்துள்ளன.
அந்தக் காணொளியில், அது தனது “முதல் மற்றும் கடைசித் தவறு” என்றும், போராட்டத் தளத்தில் இருந்த குழுக்களால் தான் தூண்டப்பட்டதாகவும் அவர் கூறுவதைக் காணலாம். “நான் போராட்டத் தளத்தில் இருந்தேன், அங்கே பல குழுக்கள் பிரதமர் மோடியை அவதூறாகப் பேசிக்கொண்டிருந்தன. அவர்கள் மற்றவர்களையும் அவ்வாறு கூறும்படி தூண்டிக்கொண்டிருந்தனர். அப்படிப்பட்ட விஷயங்களைக் கூறியதற்காக நான் மிகவும் வெட்கப்படுகிறேன், அதற்காக நான் தேசம் முழுவதிடமும் மன்னிப்பு கேட்கிறேன். இதுவே எனது முதல் மற்றும் கடைசித் தவறு,” என்று அவர் அந்த வீடியோவில் கூராமை குறிப்பிடத்தக்கது.
FIRஇல் அவரது பிறந்த ஆண்டு 1994 என்று குறிப்பிடப்பட்டிருந்தாலும், தனக்கு 15 வயதுதான் என்று அவர் கூறியுள்ளார்.
வெள்ளிக்கிழமை அன்று ஒரு காணொளிச் செய்தியில், தன்னை மட்டுமல்ல, தனது மறைந்த தாயையும் அவதூறாகப் பேசிய அனைத்து குழந்தைகளையும் மன்னிக்க விரும்புவதாக மோடி கூறினார். அவர்களைத் தண்டிப்பதோ அல்லது “நீதிமன்றங்களுக்கு அலைக்கழிப்பதோ” சூழ்நிலைகளை மாற்றப்போவதில்லை என்று அவர் கூறினார். “நான் அவர்களை மன்னிக்க விரும்புகிறேன், சமூகமும் இதை ஏற்றுக்கொள்ள வேண்டும்.”
