பிரதமர்களின் அதிகாரப்பூர்வ இல்லமான ’24 சசெக்ஸ் டிரைவ்’ (24 Sussex Drive) பழுதடைந்துள்ள நிலையில், அதன் எதிர்காலக் கட்டமைப்பு மற்றும் மறுசீரமைப்பு குறித்து நீண்டகாலமாக எதிர்பார்க்கப்பட்ட முடிவை மத்திய அரசு இன்னும் சில வாரங்களில் அறிவிக்கவுள்ளது.
ஒட்டாவாவில் உள்ள இந்த 34 அறைகளைக் கொண்ட மாளிகை, கடுமையான சுற்றுச்சூழல் மற்றும் சுகாதாரக் கேடுகள் காரணமாக கடந்த 10 ஆண்டுகளுக்கும் மேலாகப் பிரதமர்கள் யாரும் வசிக்காமல் வெறுமனே பூட்டிக் கிடக்கிறது.
தற்போதைய பிரதமர் மார்க் கார்னி இந்த இல்லத்தில் தாம் குடியேறப்போவதில்லை என்று தெரிவித்துள்ளார். ஆனால் தமக்கு அடுத்து வரும் கனேடியப் பிரதமர்கள் (Successors) இந்த வரலாற்று இல்லத்தில் கௌரவமாக வாழ்வதை உறுதி செய்ய வேண்டியது தனது கடமை என்றும் அவர் திட்டவட்டமாகக் கூறியுள்ளார்.
அதிகாரப்பூர்வ இல்லங்களை நிர்வகிக்கும் தேசிய மூலதன ஆணையத்தின் (National Capital Commission – NCC) அண்மைய கூட்டத்தில், பிரதமர்களின் அதிகாரப்பூர்வ இல்லமான ’24 சசெக்ஸ் டிரைவ்’ இனை திருத்தியமைக்கும் திட்டத்துக்கான இதற்கான ஒப்புதல் வழங்கப்பட்டுள்ளது.
இதன்படி, இந்த பாரம்பரியப் பண்பாட்டு இல்லத்தை முழுமையாகப் புதுப்பித்தல், அதன் நிலப்பரப்பை விரிவுபடுத்தல் மற்றும் 1949 ஆம் ஆண்டில் அதன் முகப்பில் சேர்க்கப்பட்ட அலங்காரக் கலை அம்சங்களை மீண்டும் பழைய நிலைக்குக் கொண்டு வருதல் போன்ற நடவடிக்கைகள் முன்னெடுக்கப்படவுள்ளன.
