பிரான்ஸ் ஜனாதிபதி இம்மானுவேல் மேக்ரோனுக்கும் கியூபெக்கின் புதிய முதல்வர் கிறிஸ்டின் ஃப்ரெச்செட்டுக்கும் இடையில் பேச்சுவார்த்தை இடம்பெற்றுள்ளது.பிரான்ஸ் தலைநகர் பாரிஸுக்கு உத்தியோகபூர்வ பொருளாதார விஜயம் மேற்கொண்டுள்ள கியூபெக் மாகாண முதல்வர் கிறிஸ்டின் ஃப்ரெச்செட் (Christine Fréchette), பிரான்ஸ் ஜனாதிபதி இம்மானுவேல் மேக்ரோனை (Emmanuel Macron) எலிசி அரண்மனையில் (Élysée Palace) சந்தித்துப்
பேச்சுவார்த்தை நடத்தியுள்ளார்.
இன்று நடைபெற்ற இந்த உயர்மட்ட இராஜதந்திரச் சந்திப்பில், செயற்கை நுண்ணறிவு (AI) தொழில்நுட்பம் மற்றும் பாதுகாப்புத் துறைக்கான கனிம வள விநியோகம் குறித்து இரு தலைவர்களும் விரிவாகக் கலந்துரையாடியுள்ளனர்.
இந்தச் சந்திப்பின் போது கியூபெக்கின் பொருளாதார மற்றும் தொழில்நுட்ப வளர்ச்சியை பிரான்ஸ் ஜனாதிபதி மேக்ரோன் வெகுவாகப் பாராட்டினார். உலகளாவிய ஆராய்ச்சி, மூலோபாயத் திட்டங்கள் மற்றும் செயற்கை நுண்ணறிவு (AI) ஆகிய துறைகளில் சர்வதேச அளவில் பங்களிப்பு செய்யக்கூடிய மிகச் சிறந்த ஆற்றல் கியூபெக் மாகாணத்திற்கு இருப்பதாக, பிரான்ஸ் ஜனாதிபதி மேக்ரோன் உறுதிசெய்தார்.
இந்தப் பேச்சுவார்த்தையின் முடிவில், புகழ்பெற்ற மொன்றியல் கனடியன்ஸ் (Habs) பனிஹொக்கி விளையாட்டு அணியின் உத்தியோகபூர்வ ஆடை (Jersey) ஒன்றை பிரான்ஸ் ஜனாதிபதிக்கு, ஃப்ரெச்செட் நட்புப்பரிசாக வழங்கினார்.
கியூபெக் மாகாணம் மற்றும் பிரான்ஸ் முதலானவற்றுக்கு இடையிலான நட்புறவை வெளிப்படுத்தும் வகையில், இந்தப் பரிசு அமைந்திருந்தது. பிரான்ஸ் ஜனாதிபதியுடனான சந்திப்புக்கு முன்னதாக, பிரான்ஸ் நாட்டு வர்த்தகப் பிரமுகர்கள் மற்றும் அரசு அதிகாரிகளுடன் நடைபெற்ற
வட்டமேஜை மாநாட்டில், கியூபெக்கின் முதல்வர் கிறிஸ்டின் ஃப்ரெச்செட் கலந்து கொண்டார்.
அந்த மாநாட்டில் உரையாற்றிய ஃப்ரெச்செட், ”ஐரோப்பாவின் நம்பகமான பொருளாதாரப் பங்காளியாகக் கியூபெக் செயல்படும்” எனக் குறிப்பிட்டார். பாதுகாப்புத் துறைக்கும் நவீன மின்சார வாகனத் தயாரிப்பிற்கும் அவசியமான 28 வகையான அரிய கனிம வளங்கள் (Critical Minerals) கியூபெக்கில் இருப்பதை, அவர் பிரெஞ்சு முதலீட்டாளர்களுக்குச் சுட்டிக்காட்டினார்.
வான்பறப்புவெளி (Aerospace) மற்றும் பாதுகாப்புத் துறை சார்ந்த முதலீடுகளைக் கியூபெக் மாகாணத்திற்கு ஈர்க்கும் நோக்கில், கிறிஸ்டின் ஃப்ரெச்செட் பிரான்ஸுக்கு மேற்கொண்டுள்ள இந்த உத்தியோகபூர்வ விஜயம் 20 ஆம் திகதி நிறைவடையும் எனத் தெரிவிக்கப்படுகின்றது.
