தமிழகத்தின் 60 ஆண்டுகால அரசியல் வரலாற்றை மாற்றி எழுதி, 2026 சட்டமன்றத் தேர்தலில் நடிகர் விஜய்யின் 'தமிழக வெற்றி கழகம் (TVK) தனிப்பெரும் பலம் கொண்ட கட்சியாக உருவெடுத்துள்ளது. நேற்று வெளியான தேர்தல் முடிவுகளில், மொத்தமுள்ள 234 தொகுதிகளில் தமிழக வெற்றி கழகம் 108 இடங்களைக் கைப்பற்றி முதலிடத்தைப் பிடித்துள்ளது.
இந்தத் தேர்தலில் ஒரு மிகப்பெரிய திருப்பமாக, கொளத்தூர் தொகுதியில் போட்டியிட்ட முதலமைச்சர் மு.க. ஸ்டாலின், தவெக வேட்பாளர் வி.எஸ். பாபுவிடம் தோல்வியடைந்தார்.ஆட்சி அமைக்கத் தேவையான 118 இடங்களை விட சற்று குறைவாகப் பெற்றிருந்தாலும், காங்கிரஸ் உள்ளிட்ட கட்சிகளின் ஆதரவுடன் விஜய் முதல்வராகப் பதவியேற்க அதிக வாய்ப்புள்ளதாகத் தெரிகிறது.
தாம் போட்டியிட்ட பெரம்பூர் மற்றும் திருச்சி கிழக்கு ஆகிய இரண்டு தொகுதிகளிலும் விஜய் அமோக வெற்றி பெற்றுள்ளார். சென்னை மற்றும் நகர்ப்புறங்களில் தமிழக வெற்றி கழக வேட்பாளர்கள் பெரும்பாலான இடங்களைக் கைப்பற்றியதன் மூலம் திமுக-வின் வாக்குவங்கியைத் தகர்த்துள்ளனர்.
ஆளுங்கட்சியான திமுக 59 இடங்களை மட்டுமே பெற்று பெரும் பின்னடைவைச் சந்தித்துள்ளது. இருப்பினும், உதயநிதி ஸ்டாலின் சேப்பாக்கம் தொகுதியில் வெற்றி பெற்று தனது இடத்தைத் தக்கவைத்துக் கொண்டார்.
எடப்பாடி பழனிசாமி தலைமையிலான அதிமுக 46 இடங்களில் வெற்றி பெற்றுள்ளது. எடப்பாடி தொகுதியில் பழனிசாமி தனது செல்வாக்கை நிரூபித்து வெற்றி பெற்றார்.கடந்த 1967-ஆம் ஆண்டு முதல் திமுக மற்றும் அதிமுக ஆகிய இரண்டு கட்சிகளுக்கிடையே மட்டுமே சுழன்று கொண்டிருந்த தமிழக அரசியல் அதிகாரம், தற்போது ஒரு மூன்றாவது சக்தியின் கைகளுக்குச்
சென்றுள்ளதாக அரசியல் நோக்கர்கள் தெரிவிக்கின்றனர்.
தமிழ்நாட்டில் ஆட்சி அமைக்க இன்னும் சில இடங்கள் தேவைப்படும் நிலையில், தமிழக வெற்றி கழகத்துக்கு ஆதரவளிக்கத் தயாராக இருப்பதாகக் காங்கிரஸ் கட்சி மறைமுகமாகத் தெரிவித்துள்ளது. இதனால் விரைவில் தமிழகத்தில் புதிய ஆட்சி மாற்றம் ஏற்பட்டு, விஜய் முதலமைச்சராகப் பதவியேற்பதற்கான ஆயத்தப் பணிகள் தொடங்கும் என எதிர்பார்க்கப்படுகிறது.
