நாட்டின் பால் உற்பத்தித் துறை (Dairy) மற்றும் கனிமவளத் (Critical Minerals) துறைகளை அமெரிக்காவின் வர்த்தகத் தாக்குதல்களில் இருந்து பாதுகாப்பதற்காகவே புதிய ஆலோசனைக் குழு உருவாக்கப்பட்டதாக, அறிவிக்கப்பட்டுள்ளது.
அமெரிக்காவுடனான வர்த்தக மோதல்களைக் கையாள்வதற்காக, முன்னணி நிறுவனங்களின் தலைவர்கள் மற்றும் அரசியல் முக்கியஸ்தர்களை உறுப்பினர்களாகக் கொண்டு, இந்த புதிய ஆலோசனைக் குழு அமைக்கப்பட்டுள்ளது.
ஜூலை மாதம் நடைபெறவுள்ள வட அமெரிக்க வர்த்தக ஒப்பந்த (CUSMA) மீளாய்வுக்கு முன்னதாக, அமெரிக்கா தனது அழுத்தங்களை அதிகரித்து வரும் நிலையில், இந்தக் குழு தனது நோக்கங்களை நிறைவேற்றுவதற்கான மூலோபாயங்களை வகுக்கும் என எதிர்பார்க்கப்படுகின்றது.
நாட்டின் பால் விநியோக முகாமைத்துவம் மற்றும் உருக்கு இரும்புத் துறை (Steel) மீதான அமெரிக்காவின் வரி விதிப்புகளை எதிர்கொள்வதற்காக, ‘நியூட்ரியன்’ (Nutrien) மற்றும் ‘ஆர்க்கெலர் மிட்டல்’ (ArcelorMittal) போன்ற பெரும் நிறுவனங்களின் தலைமை அதிகாரிகளைப் பிரதமர் மார்க் கார்னி இக்குழுவில் இணைத்துள்ளார்.
அமெரிக்காவின் மின்சார வாகனத் தயாரிப்புக்கு அவசியமான முக்கிய தாதுப்பொருட்களைக் கனடா கொண்டுள்ளதால், அதனை ஒரு துருப்புச் சீட்டாகப் பயன்படுத்தி அமெரிக்காவின் வர்த்தகத் தடைகளை நீக்க வைப்பதற்கு, இந்தக் குழு திட்டமிட்டுள்ளது.
கட்சிப் பாகுபாடின்றி தேசிய நலனைக் கருத்தில் கொண்டு, கன்சர்வேட்டிவ் கட்சியின் முன்னாள் தலைவர் எரின் ஓடூல் மற்றும் முன்னாள் அமைச்சர் லிசா ரெய்ட் ஆகியோரும் இக்குழுவில் சேர்க்கப்பட்டுள்ளமை குறிப்பிடத் தக்கது.
