கலப்படமான மேப்பிள் சிரப் விற்றமைக்கான விசாரணையை எதிர்கொள்ளும் நிறுவனத்தின் பெயரை மறைக்கும் வகையில், அதன் மேல் வேறு பெயர்களுடைய ஸ்டிக்கர்களை ஒட்டி (Fake labels) விற்பனைக்கு வைக்கப்பட்டிருந்த தகவல் தற்போது வெளியாகியுள்ளது.
“Angela” மற்றும் “L’Érabeille” போன்ற பெயர்களில் விற்பனை செய்யப்பட்ட மேப்பிள் சிரப் டப்பாக்களில் ஒட்டப்பட்டிருந்த ஸ்டிக்கர்களை மக்கள் உரித்துப் பார்த்தபோது, அதன் அடியில் மோசடியில் சிக்கிய ‘ஸ்டீவ் போர்டியூ’ (Steve Bourdeau) என்பவரின் நிறுவனத்தின் பெயர் இருப்பது கண்டறியப்பட்டுள்ளது.
ஆய்வகப் பரிசோதனையில், “சுத்தமானது” (Pure) என லேபிளிடப்பட்ட இந்த மேப்பிள் சிரப்பில் 50 சதவீதம் கரும்புச் சர்க்கரை கலந்திருக்கின்றமை உறுதி செய்யப்பட்டுள்ளது.
இந்தச் செய்தி பரவியதை அடுத்து, ஐ.ஜி.ஏ (IGA), மெட்ரோ (Metro) போன்ற முன்னணி பல்பொருள் அங்காடிகள் தங்களது விற்பனை நிலையங்களில் இருந்து இந்தத் தயாரிப்புகளையும் உடனடியாக அகற்றியுள்ளன.
“Angela” மற்றும் “L’Érabeille” போன்ற லேபிள்கள் கொண்ட மேப்பிள் சிரப் கொள்கலன்களை வாங்கிய வாடிக்கையாளர்கள், அவற்றைத் திருப்பி வழங்கி முழுமையான பணத்தைப் பெற்றுக்கொள்ளுமாறு அறிவுறுத்தப்பட்டுள்ளனர்.
சர்வதேச அளவில் மேப்பிள் சிரப் உற்பத்தியில் முதலிடம் வகிக்கும் கியூபெக் மாகாணத்தின் புகழுக்கு இந்தச் சம்பவம் பெரும் களங்கத்தை ஏற்படுத்தியுள்ளதாகத் தொழில்முறை அமைப்புகள் கவலை வெளியிட்டுள்ளன.
