கனடா தனது டிஜிட்டல் சேவை வரியை (DST) இரத்து செய்வதாக அறிவித்துள்ளது.
அமெரிக்காவின் கோரிக்கைகளுக்கு இணங்கவும், அமெரிக்காவுடனான முக்கிய வர்த்தகப் பேச்சுவார்த்தைகளை மீண்டும் தொடங்குவதற்கும் கனடாவின் இந்த கொள்கைமுடிவு உதவும் என எதிர்பார்க்கப்படுகின்றது.
கடந்த ஆண்டு சட்டமாக்கப்பட்டு, அமுல்படுத்தப்படவிருந்த டிஜிட்டல் சேவை வரி, திங்கட்கிழமை முதல் வசூலிக்கப்படவிருந்தது.
இந்த டிஜிட்டல் சேவை வரி, அமேசான், கூகுள், மெட்டா, ஊபர் மற்றும் ஏர்பிஎன்பி போன்ற பெரிய அமெரிக்க தொழில்நுட்ப நிறுவனங்கள் கனேடிய பயனாளிகளிடமிருந்து பெறும் வருமானத்தில் மூன்று சதவீதத்தை, கனேடிய அரசுக்கு செலுத்த வேண்டும் என, வற்புறுத்தியது.
தற்போது, இந்த வரி வசூல் நிறுத்தப்படும் என்று அறிவிக்கப்பட்டுள்ளது.
டிஜிட்டல் சேவை வரிச் சட்டத்தை இரத்து செய்வதற்கான சட்டமூலத்தை, கனடாவின் நிதி அமைச்சர் பிராங்கோயிஸ்-பிலிப் ஷாம்பெயின் விரைவில் கொண்டு வருவார் என்றும் கனடாவின் நிதியமைச்சு உறுதிப்படுத்தியுள்ளது.
அமெரிக்காவுடன் புதிய பொருளாதார மற்றும் பாதுகாப்பு கூட்டுமுயற்சி குறித்த சிக்கலான பேச்சுவார்த்தைகளில் கனடா ஈடுபட்டுள்ளதாகவும், அந்தப் பேச்சுவார்த்தைகளில் முன்னேற்றம் காண்பதற்காகவும், “அனைத்து கனேடியர்களுக்கும் வேலை வாய்ப்புகளை உருவாக்கி, செழிப்பை கட்டியெழுப்பும் எங்கள் பணிகளை வலுப்படுத்துவதற்காகவும்” இந்த வரி இரத்து செய்யப்படுவது உதவும் என்றும் அமைச்சர் ஷாம்பெயின் சமூக ஊடகப் பதிவு ஒன்றில் தெரிவித்தார்.
“பரஸ்பர நன்மை பயக்கும் விரிவான வர்த்தக ஏற்பாட்டிற்கான எதிர்பார்ப்பில்” இந்த முடிவு எடுக்கப்பட்டதாக கனேடிய மத்திய அரசு தெரிவித்துள்ளது.
இந்நிலையில், பிரதமர் கார்னியும் அமெரிக்க ஜனாதிபதி ட்ரம்பும் பேச்சுவார்த்தைகளை மீண்டும் தொடங்குவதற்கு ஒப்புக்கொண்டுள்ளனர்.
இருநாடுகளுக்கும் இடையிலான ஒரு வர்த்தக உடன்பாட்டை, ஜூலை மாதம் 21 ஆம் திகதிக்குள், எட்டுவதே இதன் இலக்காகும்.
கடந்த வெள்ளிக்கிழமை, இந்த டிஜிட்டல் சேவை வரியின் காரணமாக கனடாவுடனான அனைத்து வர்த்தகப் பேச்சுவார்த்தைகளையும் தாம் நிறுத்துவதாக அமெரிக்க ஜனாதிபதி ட்ரம்ப் அறிவித்திருந்தமை சுட்டிக்காட்டத்தக்கது.
