ஒன்ராறியோ மாகாணத்தில் உள்ள பிக்கரிங் நகராட்சி, சுமார் இரண்டு ஆண்டுகளுக்குப் பின்னர் மீண்டும் நேரடி நகரமன்றக் கூட்டங்களை நடத்தத் தீர்மானித்துள்ளது.
இதன்படி, நவம்பர் 16ஆம் திகதி முதல் புதிதாகப் புனரமைக்கப்பட்ட நகரமன்றக் கூட்ட அரங்கில் நேரடிக் கூட்டங்கள் ஆரம்பமாகவுள்ளன.
முன்னாள் நகரமன்ற உறுப்பினர் லிசா ராபின்சனின் நடத்தையைத் தொடர்ந்து ஏற்பட்ட பாதுகாப்பு அச்சுறுத்தல்கள், இடையூறுகள் மற்றும் மிரட்டல்களைக் கருத்திற்கொண்டு, கடந்த இரண்டு ஆண்டுகளாக நகரமன்ற நடவடிக்கைகள் இணையவழியில் முன்னெடுக்கப்பட்டு வந்தன.
குடியிருப்பாளர்கள், நகராட்சி ஊழியர்கள் மற்றும் மன்ற உறுப்பினர்களின் பாதுகாப்பை உறுதிப்படுத்தும் நோக்கில் இந்த மாற்றம் மேற்கொள்ளப்பட்டதாக மேயர் கெவின் ஆஷே தெரிவித்துள்ளார்.
இதற்கிடையில், சுமார் 3.3 மில்லியன் கனேடிய டொலர் செலவில் நகரமன்றக் கூட்ட அரங்கு முழுமையாகப் புனரமைக்கப்பட்டுள்ளது.
1989ஆம் ஆண்டு நகராட்சி கட்டிடம் திறக்கப்பட்ட பின்னர் மேற்கொள்ளப்படும் முக்கியமான கட்டமைப்பு மற்றும் தொழில்நுட்ப மேம்பாடுகளில் இதுவும் ஒன்றாகும்.
குறிப்பாக, மாற்றுத்திறனாளிகள் இலகுவாகப் பயன்படுத்தக்கூடிய வகையில் சரிவுப்பாதைகள் அமைக்கப்பட்டுள்ளதுடன், தரை மட்டங்களும் மாற்றியமைக்கப்பட்டுள்ளன.
மேலும், ஊழியர்கள் மற்றும் மன்ற உறுப்பினர்களின் பாதுகாப்பை உறுதிப்படுத்தும் வகையில் கண்ணாடித் தடுப்புகள், அவசரகால அறை மற்றும் மாற்று அவசர வெளியேறும் வழி உள்ளிட்ட பாதுகாப்பு ஏற்பாடுகளும் செய்யப்பட்டுள்ளன.
முன்னாள் நகரமன்ற உறுப்பினர் லிசா ராபின்சன் தொடர்பாக 2023ஆம் ஆண்டு முதல் நகரத்தின் நேர்மை ஆணையாளர் ஒன்பது விசாரணைகளை முன்னெடுத்திருந்தார். இதன் விளைவாக அவர் பல்வேறு ஊதியமற்ற இடைநீக்கங்களையும் எதிர்கொண்டிருந்தார்.
இந்நிலையில், நகரமன்ற நடவடிக்கைகளில் ஒழுக்கத்தையும் பரஸ்பர மரியாதையையும் மீண்டும் நிலைநாட்டுவதற்கான புதிய அத்தியாயமாக நேரடிக் கூட்டங்களுக்கான இந்தத் திரும்புதல் அமையும் என மேயர் கெவின் ஆஷே நம்பிக்கை வெளியிட்டுள்ளார்.
