கியூபெக் மாகாணத்தில் அமைந்துள்ள புகழ்பெற்ற மெக்கில் பல்கலைக்கழகத்தின் (McGill University) சட்டப் பீடத்தில் பயின்று வருபவரும் படுகொலை வழக்கில் தண்டனை பெற்றவருமான கைதி ஒருவரின் பல்கலைக்கழக வருகை, பிற மாணவர்கள் மத்தியில் கடும் விவாதங்களை ஏற்படுத்தியுள்ளது.
ஜெப்ரி ஜோர்ஜ் இவெர்ட் (Jeffrey George Ewert) என்ற இந்த கைதி, பகல்நேர பரோல் (day parole) விடுப்பில் உள்ளார். அந்த நிலையில், கடந்த ஓகஸ்ட் மாதம் முதல் மெக்கில் பல்கலைக்கழகத்தின் சட்ட வகுப்புகளிலும் நிகழ்வுகளிலும் கலந்துகொண்டு வந்துள்ளார்.
இந்நிலையில், இவரது வன்முறைப் பின்னணி குறித்து தங்களுக்கு முன்கூட்டியே தெரிவிக்கப்படவில்லை என்றும், இது தமக்கு அச்சுறுத்தலாக உள்ளதாகவும் பல மெக்கில் பல்கலைக்கழக மாணவிகள் கவலை வெளியிட்டுள்ளனர்.
கடந்த 1984ஆம் ஆண்டு இடம்பெற்ற இரண்டு வன்முறைத் தாக்குதல்களுக்காக ஜெப்ரிக்கு ஆயுள் தண்டனை விதிக்கப்பட்டிருந்தது. அவர் ஒரு பெண்ணைக் கொலை செய்து பாலியல் வன்கொடுமைக்கு உட்படுத்தியதுடன், மற்றொரு சந்தர்ப்பத்தில் 15 வயது சிறுமியைத் தாக்கி கடுமையாகக் காயப்படுத்தியுள்ளார். இச்சம்பவத்தில் அந்தச் சிறுமி வாழ்நாள் முழுவதும் முடங்கும் நிலைக்குத் தள்ளப்பட்டார்.
பரோல் பெறுவதற்கு முன்னர் தனது தண்டனைக் காலத்தைச் சிறையில் கழித்த ஜெப்ரி, கடந்த 2025ஆம் ஆண்டு பகல்நேர பரோலில் விடுவிக்கப்பட்டார்.
மெக்கில் பல்கலைக்கழகத்தின் சேர்க்கை நடைமுறைகளின்போது குற்றவியல் பின்னணிப் பரிசோதனைகள் பொதுவாக மேற்கொள்ளப்படுவதில்லை எனவும், தனியுரிமச் சட்டங்களைக் காரணம் காட்டி மாணவர்களின் தனிப்பட்ட விபரங்களை வெளியிட முடியாது எனவும் பல்கலைக்கழக நிர்வாகம் தெரிவித்துள்ளது.
எனினும், வளாகத்தில் மாணவர்களின் பாதுகாப்புக்கு அச்சுறுத்தல் ஏற்படும் வகையில் தகவல்கள் வரின் உடனடியாகத் தகுந்த நடவடிக்கை எடுக்கப்படும் என மெக்கில் பல்கலைக்கழகம் உறுதியளித்துள்ளது.
