கனடாவில் கடத்தல் வழக்கில் மேலும் ஒரு ராணுவ வீரர் கைது

கனடாவில் கடத்தல் தொடர்பான விசாரணையில் கனேடிய ஆயுதப் படையைச் (CAF) சேர்ந்த மூன்றாவது நபரும் கைது செய்யப்பட்டுள்ளதாக டொரோண்டோ பொலிஸார் புதன்கிழமை அறிவித்துள்ளனர்.

கடந்த ஜூலை 25ஆம் திகதி நடந்த கடத்தல் சம்பவம் குறித்து ஆரம்பிக்கப்பட்ட விசாரணையை அடுத்து இந்த கைது நடவடிக்கைகள் மேற்கொள்ளப்பட்டுள்ளதாக டொரோண்டோ காவல்துறை தலைமை கண்காணிப்பாளர் ஜோ மாத்யூஸ் செய்தியாளர் சந்திப்பில் தெரிவித்தார்.

பாதிக்கப்பட்ட நபர் துப்பாக்கி முனையில் காரில் அடைக்கப்பட்டு, கைவிலங்கிடப்பட்டு, கிரிப்டோகரன்சி சொத்துக்களை அணுக முயன்றபோது தாக்கப்பட்டதாகப் பொலிஸார் குற்றம் சாட்டியுள்ளனர்.

இந்த விசாரணையின்போது டொரோண்டோவைச் சேர்ந்த 24 வயதுடைய காப்பக ராணுவப் பிரிவு (reserve member) உறுப்பினரான ஜாக் மைலி செப்டம்பர் 24ஆம் திகதி கைது செய்யப்பட்டார்.

அவர் மீது துப்பாக்கியால் பணத்திற்காகக் கடத்துவது (kidnapping for ransom) , வலுக்கட்டாயமாக அடைத்து வைத்தல் (forcible confinement) மற்றும் பல துப்பாக்கி வழக்குகள் உட்பட ஏழு குற்றச்சாட்டுகள் சுமத்தப்பட்டுள்ளதாக மாத்யூஸ் தெரிவித்தார்.

இதற்கு முன்னதாக, அதே விசாரணையின் தொடர்பில் ஆகஸ்ட் 11ஆம் திகதி 7 வது டொரோண்டோ படைப்பிரிவைச் சேர்ந்த தாலாரம்பகே பெர்னாண்டோ (Talarambage Fernando) மற்றும் ஜேம்ஸ் மோரோ (James Moreau) ஆகிய இரண்டு காப்பக ராணுவப் பிரிவு உறுப்பினர்கள் கைது செய்யப்பட்டதாகப் பொலிஸார் அறிவித்திருந்தனர்.  மைலி (Miley) வேறுபட்ட படைப்பிரிவைச் சேர்ந்தவர் என்று பொலிஸார் புதன்கிழமை தெரிவித்தனர்.

மேலும் நான்கு குடிமக்களும் கைது செய்யப்பட்டுள்ளனர்.

சந்தேகநபர்களின் ராணுவ ஈடுபாடு கவலை அளிப்பதாகக் குறிப்பிட்ட மாத்யூஸ், இவர்கள் துப்பாக்கிகளை அணுகக்கூடிய உயர்பயிற்சி பெற்ற நபர்கள் என்றும், இது சமூகத்திற்கும் அதிகாரிகளுக்கும் கவலை ஏற்படுத்துவதாகவும் கூறினார்.

இந்த வழக்கு நீதிமன்றத்தில் இருப்பதால் மேலதிக விவரங்களை வழங்க முடியாது எனத் தெரிவித்த காவல்துறை அதிபதி மைரோன் டெம்கிவ், பொதுமக்கள் நம்பிக்கையைக் காப்பதன் முக்கியத்துவம் குறித்துப் பேசினார். அவர் ராணுவம், காவல்துறை அல்லது பொது அதிகாரியாக இருந்தாலும் யாரும் சட்டத்திற்கு அப்பாற்பட்டவர்கள் அல்ல என்றார்.

விசாரணையின் போது குறைந்தது நான்கு துப்பாக்கிகள் மற்றும் ராணுவத்திலிருந்து திருடப்பட்டதாகக் கூறப்படும் 2,700 சுற்று வெடிமருந்துகள் (அவற்றில் பாதி வெடிக்காதவை) மீட்கப்பட்டன.

மேலும், பெரிய அளவிலான கொக்கைன், மெத்தபெட்டமைன் மற்றும் பிற கட்டுப்படுத்தப்பட்ட பொருட்களும் கண்டெடுக்கப்பட்டன.

பெர்னாண்டோ (22) மற்றும் மோரோ (29) ஆகியோர் மீது மொத்தம் 49 குற்றச்சாட்டுகள் சுமத்தப்பட்டுள்ளன.

இருவரும் தங்கள் கடமைகளில் இருந்து நீக்கப்பட்டு, ராணுவ வசதிகள் மற்றும் தளங்களுக்கான அணுகல் தடை செய்யப்பட்டுள்ளது என்று தேசிய பாதுகாப்புத் துறை தெரிவித்துள்ளது.

கைது செய்யப்பட்ட ஏழு பேரும் எவ்வாறு ஒருவருக்கொருவர் தெரியும் என்பது தெளிவாகத் தெரியவில்லை என்றும், அது விசாரணையின் ஒரு பகுதி என்றும் மாத்யூஸ் கூறினார்.

பெரிய அளவிலான ஒழுங்கமைக்கப்பட்ட குற்றக் குழுக்களுடன் இவர்களுக்குத் தொடர்பு இருப்பதாக எந்த அறிகுறியும் இல்லை என்றாலும், கைப்பற்றப்பட்ட தொலைபேசிகளை ஆய்வாளர்கள் தொடர்ந்து ஆராய்ந்து வருகின்றனர்.