கல்வி அமைச்சினால் நடத்தப்பட்ட 2026ஆம் ஆண்டுக்கான பாடசாலைகளுக்கு இடையிலான தேசிய குத்துச்சண்டைப் போட்டியில், முல்லைத்தீவு மாவட்டத்தின் மல்லாவி மத்திய கல்லூரி மாணவர்கள் மூவர் பதக்கங்களை வென்று சாதனை படைத்துள்ளனர்.
கொழும்பு சுகததாச உள்ளக அரங்கில் ஒக்டோபர் 5ஆம் திகதி முதல் 9ஆம் திகதி வரை ஐந்து நாட்களாக நடைபெற்ற இப்போட்டியின் இறுதிப் போட்டிகள் நேற்று (09.10.2026) நடைபெற்றன.
இப்போட்டியில் பங்குபற்றிய மல்லாவி மத்திய கல்லூரி மாணவர்கள் ஒருவர் வெள்ளிப் பதக்கத்தையும், இருவர் வெண்கலப் பதக்கங்களையும் வென்று பாடசாலைக்கும், பிரதேசத்துக்கும், துணுக்காய் கல்வி வலயத்துக்கும், முல்லைத்தீவு மாவட்டத்துக்கும் பெருமை சேர்த்துள்ளனர்.
பதக்கங்களை வென்ற மாணவர்களின் விபரங்கள் வருமாறு எஸ். டானுஜா (S. Danuja) 57–60 கிலோகிராம் எடைப் பிரிவில் வெள்ளிப் பதக்கம், எம். அபிஷா (M. Abisha) 60–65 கிலோகிராம் எடைப் பிரிவில் வெண்கலப் பதக்கம், யு.கலைவாணி (U. Kalaivaani) – 16 வயதுக்குட்பட்ட பெண்களுக்கான 48–50 கிலோகிராம் எடைப் பிரிவில் வெண்கலப் பதக்கம்.
இம்மாணவர்களுக்கான குத்துச்சண்டைப் பயிற்சிகளை, முன்னாள் தேசிய குத்துச்சண்டை வீரரும் பல தேசிய வீரர்களை உருவாக்கியவருமான கா. நாகேந்திரன் (வள்ளுவன் மாஸ்டர்) மற்றும் முன்னாள் தேசிய வீராங்கனையும் குத்துச்சண்டைப் பயிற்றுநருமான இந்துகா தேவி ஆகியோர் வழங்கியிருந்தனர்.
தேசிய மட்டப் போட்டியில் மூன்று பதக்கங்களை வென்றதன் மூலம், வடமாகாணப் பாடசாலைகளில் அதிக பதக்கங்களைப் பெற்ற பாடசாலையாக மல்லாவி மத்திய கல்லூரி சாதனை படைத்துள்ளது.
குத்துச்சண்டைப் போட்டியில் மாணவர்கள் வெளிப்படுத்திய திறமையும் விடாமுயற்சியும் பாடசாலையின் விளையாட்டுத்துறை வளர்ச்சிக்குச் சான்றாக அமைந்துள்ளதுடன், மல்லாவி பிரதேசத்துக்கும் துணுக்காய் கல்வி வலயத்துக்கும் முல்லைத்தீவு மாவட்டத்துக்கும் பெருமை சேர்த்துள்ளனர்.
