ரியாத் விமான நிலையத்தின் மீது வியாழக்கிழமை(08.10.2026) நடத்தப்பட்ட தாக்குதல்களில் மூவர் உயிரிழந்துள்ளதாக சவூதி அதிகாரப்பூர்வ தரப்பு வெள்ளிக்கிழமை (09.10.2026) தெரிவித்துள்ளது.
அமெரிக்க-ஈரான் மோதலால் தீவிரமடைந்துள்ள போருக்கு மத்தியில், யேமனின் ஹவுதி அமைப்பு சவூதி அரேபியா மீதான ஏவுகணைத் தாக்குதல்களை அதிகரித்துள்ளதுடன், அந்நாட்டின் வான்வெளியை மூடவும் முயற்சித்துள்ளது.
இந்தத் தாக்குதல்களில் சிலர் காயமடைந்ததுடன், ‘சவூதியா’ (Saudia) விமான நிறுவனத்தின் விமானம் ஒன்றும் சேதமடைந்தது. உயிரிழந்தவர்களில் ஒருவர் தமது ஊழியர் என சவூதியா நிறுவனம் தெரிவித்துள்ளது.
தாக்குதலைத் தொடர்ந்து, சர்வதேச எண்ணெய் மாநாடு நடைபெறவுள்ள நிலையில், பல விமான நிறுவனங்கள் ரியாத்துக்கான சேவைகளை ரத்து செய்தன.
இருப்பினும், விமான நிலையப் போக்குவரத்து பின்னர் இயல்பு நிலைக்குத் திரும்பியதாக சவூதி சிவில் விமானப் போக்குவரத்து அதிகாரசபை தெரிவித்துள்ளது.
இதற்குப் பதிலடியாக, யேமன் தலைநகர் சனாவில் உள்ள ஹவுதி இலக்குகள் மீது சவூதி தலைமையிலான கூட்டுப்படை வான்வழித் தாக்குதல்களை நடத்தியுள்ளது.
ஹவுதிகளின் மூன்று ஏவுகணை செலுத்தும் தளங்களை அழித்துள்ளதாகக் கூறியுள்ள கூட்டுப்படை, பொதுமக்கள் மீதான தாக்குதல்களுக்கு கடுமையான பதில் அளிக்கப்படும் என எச்சரித்துள்ளது.
அமெரிக்கா மற்றும் இஸ்ரேல் பிப்ரவரி 28 அன்று ஈரான் மீது நடத்திய தாக்குதலைத் தொடர்ந்து வெடித்த பிராந்திய மோதலின் தீவிரமான முனையாக யேமன் உள்நாட்டுப்போர் உருவெடுத்துள்ளது.
செங்கடல் மற்றும் பாப் அல்-மந்தேப் நீரிணை வழியாகச் செல்லும் கப்பல்கள் மீது ஹவுதிகள் தாக்குதல் நடத்தி வருகின்றனர்.
சவூதி அரேபிய வான்வெளியை ஏவுகணைப் போர் மண்டலமாக அறிவித்துள்ள ஹவுதிகள், மெக்கா மற்றும் மதினா தவிர ஏனைய பகுதிகள் வழியாகப் பறக்கும் விமானங்கள் குறித்து வெள்ளிக்கிழமை மீண்டும் எச்சரிக்கை விடுத்துள்ளனர். மேலும் எண்ணெய் நிறுவன ஊழியர்களையும் எச்சரித்துள்ளனர்.
இதனிடையே, சவூதி அரேபியாவிற்கு வான்வழிப் பயணம் மேற்கொள்வதைத் தவிர்க்குமாறு ஐரோப்பிய ஒன்றிய வான்வழிப் பாதுகாப்பு முகமை மற்றும் OPSGROUP ஆகிய அமைப்புகள் அறிவுறுத்தியுள்ளன.
ஐக்கிய அரபு அமீரகத்தில் உள்ள அமெரிக்கத் தூதரகமும் தனது குடிமக்களுக்கு விழிப்புணர்வு எச்சரிக்கை விடுத்துள்ளது.
