சர்வதேச குற்றவியல் நீதிமன்றத்திற்கு (ICC) எதிராக அமெரிக்க அதிபர் டொனால்ட் ட்ரம்ப்பின் நிர்வாகம் வெள்ளிக்கிழமை(09.10.2026) தடைகளை விதித்துள்ளது.
சர்வதேச குற்றவியல் நீதிமன்றத்தின் முன்னாள் நீதிபதி ஒருவருக்கு அமைதிக்கான நோபல் பரிசு அறிவிக்கப்பட்ட சில மணி நேரங்களிலேயே இந்த நடவடிக்கை எடுக்கப்பட்டுள்ளது.
இந்த நடவடிக்கையை கடுமையாகக் கண்டித்துள்ள சர்வதேச குற்றவியல் நீதிமன்றம், இது சட்டத்தின் ஆட்சி மற்றும் சர்வதேச சட்ட அமைப்பின் அடிப்படைகள் மீதான தாக்குதல் என தெரிவித்துள்ளது.
மேலும், நீதிமன்றத்தை பாதுகாக்கும் நடவடிக்கைகளில் ஈடுபடுமாறு தனது 125 உறுப்பு நாடுகளுக்கும் அழைப்பு விடுத்துள்ளது.
அமெரிக்கர்களை சர்வதேச குற்றவியல் நீதிமன்றம் விசாரணைக்கு உட்படுத்துவதை அதிபர் ட்ரம்ப் ஒருபோதும் அனுமதிக்கமாட்டார் என்றும், அதனால் இந்த நீதிமன்றத்திற்கு தடைகள் விதிக்கப்படுவதாகவும் அமெரிக்க வெளியுறவுச் செயலர் மார்கோ ரூபியோ தெரிவித்துள்ளார்.
இதன் மூலம் நீதிமன்றத்துடனான பரிவர்த்தனைகள் தடைசெய்யப்பட்டு, அதன் வளங்கள் துண்டிக்கப்படும் எனவும் அவர் குறிப்பிட்டுள்ளார்.
அமெரிக்க கருவூலம் அறிவித்துள்ள இந்த தடைகளில், ஆறு மாத கால அவகாசம் மற்றும் தொலைத்தொடர்பு, மென்பொருள், ஓய்வூதியம் போன்ற சில விலக்குகளும் வழங்கப்பட்டுள்ளன.
அமெரிக்காவின் கவலைகளுக்கு தீர்வுகாண நீதிமன்றத்திற்கும் அதன் உறுப்பு நாடுகளுக்கும் வாய்ப்பளிக்கும் வகையில் இந்த அவகாசம் வழங்கப்பட்டுள்ளதாக ரூபியோ தெரிவித்துள்ளார்.
அதேவேளை, சர்வதேச அளவிலான சட்டத்தின் ஆட்சியை குறைமதிப்பிற்கு உட்படுத்தும் நோக்கிலேயே இந்த தடைகள் விதிக்கப்பட்டுள்ளதாகவும், இருப்பினும் தமது விசாரணைகள் மற்றும் வழக்குத் தொடரும் பணிகள் தொடரும் என்றும் சர்வதேச குற்றவியல் நீதிமன்றத்தின் துணை தலைமை வழக்கறிஞர் நஷாத் ஷமீம் கான் தெரிவித்துள்ளார்.
இஸ்ரேலிய பிரதமர் பெஞ்சமின் நெதன்யாகு உள்ளிட்ட அதிகாரிகளுக்கு எதிராக பிடியாணை பிறப்பித்தமை மற்றும் ஆப்கானிஸ்தானில் அமெரிக்க வீரர்களின் நடவடிக்கைகள் தொடர்பான விசாரணைகள் ஆகியவை தொடர்பாக அமெரிக்கா இந்த நீதிமன்றத்தை கண்டித்து வருகிறது.
அமெரிக்காவின் இந்த தடை அறிவிப்புக்கு முன்னதாக, 2003 முதல் 2008 வரை இந்த நீதிமன்றத்தின் மேல்முறையீட்டு அமர்வில் பணியாற்றிய தென்னாப்பிரிக்க சட்ட நிபுணர் நவி பிள்ளைக்கு அமைதிக்கான நோபல் பரிசு அறிவிக்கப்பட்டது.
சர்வதேச சட்ட நிறுவனங்கள் அரசியல் தாக்குதலுக்கு உள்ளாகியுள்ள இந்த நேரத்தில், அவர்களுக்கு ஆதரவு தெரிவிக்கும் வகையிலேயே இந்த பரிசு வழங்கப்பட்டுள்ளதாக நோபல் குழு தெரிவித்துள்ளது.
