இங்கிலாந்திற்கு உத்தியோகபூர்வ விஜயம் மேற்கொண்டுள்ள அமெரிக்க ஜனாதிபதி டொனால்ட் ட்ரம்ப், இந்கிலாந்தின் அரச நெறிமுறைகளை மீறியதாக, இணையவாசிகள் கண்டனம் தெரிவித்து வருகின்றனர்.
இங்கிலாந்திற்கு உத்தியோகபூர்வ விஜயம் மேற்கொண்டுள்ள அமெரிக்க ஜனாதிபதி டொனால்ட் ட்ரம்பிற்கு மன்னர் மூன்றாம் சார்லஸ் உற்சாக வரவேற்பு அளித்தார்.
அரச விவகாரங்கள் மற்றும் ஒப்பந்தங்கள் மேற்கொள்ளப்படும் வின்சோர் கோட்டைப் பகுதியில், ஜனாதிபதி ட்ரம்ப் மற்றும் அவரது மனைவி மெலனியா ஆகியோரை மன்னர் மூன்றாம் சார்லஸ் குதிரைகள் பூட்டிய வாகனத்தில் ஊர்வலமாக அழைத்துச் சென்றார்.
இந்நிலையில், வின்சோர் கோட்டைப் பகுதியில் இராஜ ஊர்வலம் முடிவடைந்த பின்னர், அரச அணிவகுப்பை மன்னர் மூன்றாம் சார்லஸ் மற்றும் ட்ரம்ப் ஆகியோர் பார்வையிட்டனர். அப்போது, மன்னர் சார்லஸை கடந்து சில அடிகள் முன்னதாக ட்ரம்ப் நடந்து செல்லும் காணொளி இணையத்தில் வெளியானது.
இங்கிலாந்து மன்னருக்கு முன் அவரது விருந்தினர் ஒருவர் நடந்து செல்வது, அந்நாட்டு அரச நெறிமுறைகளை மீறும் செயல் எனக் கூறப்படும் நிலையில், ட்ரம்ப் அவ்வாறு நடந்து சென்றது அவமரியாதையான ஒன்று என இணையவாசிகள் கண்டனம் தெரிவித்து வருகின்றனர்.
ஆனால், அணிவகுப்பை பார்வையிட செல்லும் மன்னர் சார்லஸ், ட்ரம்ப்பை முன்னால் செல்ல செய்கை செய்வது போன்ற காணொளியும் வெளியாகியுள்ளது. இதுபோன்ற, அணிவகுப்புக்களை விருந்தினராக வந்திருக்கும் மற்ற நாட்டு தலைவர்கள் முன்னால் சென்று பார்வையிடுவது மரியாதை நிமித்தமான வழக்கம் எனக் கூறப்படுகிறது.
இத்துடன், இங்கிலாந்தின் பட்டத்து இளவரசர் வில்லியம்ஸ் உடனான சந்திப்பின்போது அவருடன் கைகுலுக்கிய ட்ரம்ப், மற்றொரு கையால் இளவரசரின் தோளில் தட்டியதாகவும் இதுவும் அரச நெறிமுறை மீறல் என பரவலாகப் பேசப்படுகிறமையும் குறிப்பிடத்தக்கது.
