கியூபெக்கின் புதிய முதல்வராகவுள்ள ‘பார்ட்டி கியூபெகோவா’ (Parti Quebecois – PQ) கட்சித்தலைவர் போல் செயிண்ட்-பியர் பிளமண்டன் (Paul St-Pierre Plamondon) க்கு பிரதமர் மார்க் கார்னி (Mark Carney) வாழ்த்துத் தெரிவித்துள்ளார்.
வலிமையான கியூபெக்கை உருவாக்குவதே வலிமையான கனடாவை உருவாக்குவதற்கான முக்கிய நோக்கம் என்று, பிரதமர் மார்க் கார்னி தமது வாழ்த்துச் செய்தியில் குறிப்பிட்டுள்ளார்.
சுமார் பத்தாண்டு காலம் எதிர்க்கட்சி வரிசையில் இருந்த பார்ட்டி கியூபெகோவா கட்சியின் இந்த அதிகார மீள்வருகைக்கு, காரணங்களாக, மாகாணத்தில் நிலவும் வாழ்க்கைச் செலவின உயர்வு மற்றும் பிரெஞ்சு மொழியைப் பாதுகாப்பதற்கான மக்களின் தீவிர விருப்பமுமே காணப்படுகின்றன.
எனினும், தற்போதைய கருத்துக்கணிப்புகளின்படி, ‘பார்ட்டி கியூபெகோவா‘ கட்சி வலியுறுத்திவரும் தனிநாடு கோரிக்கையை, கியூபெக் மக்களில் 30 சதவீதமானோர் மட்டுமே ஆதரிக்கின்றனர்.
இந்த நிலையில், அமெரிக்க அதிபர் டொனால்ட் ட்ரம்ப் தனது பதவிக் காலத்தை நிறைவு செய்த பின்னரே, அதாவது 2029 ஆம் ஆண்டிற்குப் பிறகே தனிநாடு தொடர்பான சுயாட்சி வாக்கெடுப்பு (Referendum) நடத்தப்படும் என, பிளமண்டன் தெளிவுபடுத்தியுள்ளமை குறிப்பிடத் தக்கது.
