எத்தியோப்பிய அரச படைகளும் அதனுடன் இணைந்த ஆயுதக் குழுக்களும் டைக்ரே பிராந்தியத்தின் தலைநகரான மெக்கெல்லையை (Mekelle) மீண்டும் தமது கட்டுப்பாட்டுக்குள் கொண்டுவந்துள்ளதாக மூன்று மூலாதாரங்கள் தெரிவித்துள்ளன.
வட பிராந்தியத்தை ஆட்சி செய்யும் எதிர்க்கட்சி கூட்டணிக்கு இது ஒரு பெரிய பின்னடைவாகக் கருதப்படுகிறது.
எதிர்க்கட்சி கூட்டணிக்கு தலைமை தாங்கும் டைக்ரே மக்கள் விடுதலை முன்னணி (TPLF), தாம் தலைநகரில் இருந்து பின்வாங்கியுள்ளதாகவும், பிராந்திய அரசு தற்காலிகமாக மெக்கெல்லையை விட்டு வெளியேறி வேறு இடத்திலிருந்து இயங்கும் என்றும் ஃபேஸ்புக் பக்கத்தில் வெளியிட்டுள்ள அறிக்கையில் தெரிவித்துள்ளது.
அரசு ஆதரவு ஆயுதக் குழுவான டைக்ரே அமைதிப் படையைச் சேர்ந்த மூலாதாரம் ஒன்று தெரிவிக்கையில், சனிக்கிழமை பிற்பகலில் தமது போராளிகள் மெக்கெல்லையின் மையப்பகுதிக்குள் நுழைந்ததாகவும், அவர்களைத் தொடர்ந்து எத்தியோப்பிய இராணுவம் உள்ளே நுழைந்ததாகவும் கூறியுள்ளது.
மேலும், பெயரைக் குறிப்பிட விரும்பாத தொண்டு நிறுவன மூலாதாரம் ஒன்றும், மெக்கெல்லையில் வசிக்கும் நபர் ஒருவரும் இந்நகரம் அரச படைகளின் கட்டுப்பாட்டில் உள்ளதை உறுதிப்படுத்தியுள்ளனர்.
இருப்பினும், இது தொடர்பாக கருத்து தெரிவிக்குமாறு விடுக்கப்பட்ட கோரிக்கைக்கு பிரதமரின் அலுவலகம் உடனடியாக பதில் அளிக்கவில்லை.
செப்டம்பர் 23 அன்று எத்தியோப்பிய இராணுவத்திற்கு எதிராக பெரிய அளவிலான தாக்குதலைத் தொடங்கிய TPLF தலைமையிலான எதிர்க்கட்சி கூட்டணிக்கு, மெக்கெல்லையை இழந்தமை மிகப்பெரிய இழப்பாகும்.
எத்தியோப்பிய மத்திய படைகளும் அவற்றுடன் இணைந்த போராளிகளும் டைக்ரே பகுதிக்குள் விரைவான எதிர் தாக்குதலை நடத்தியுள்ளனர்.
2020-2022 உள்நாட்டுப் போருக்குப் பின்னரான மிக மோசமான இந்த மோதல், மேலும் பரந்த பிராந்திய மோதலாக உருவெடுக்கும் அபாயம் உள்ளதாக பகுப்பாய்வாளர்கள் கூறுகின்றனர்.
இதனிடையே, கிளர்ச்சி கூட்டணிக்கு எரித்திரியா ஆதரவளிப்பதாகக் குற்றம்சாட்டி, அண்டை நாடான எரித்திரியாவுடனான இராஜதந்திர உறவுகளை அட்டிஸ் அபாபாவில் உள்ள மத்திய அரசு கடந்த வாரம் துண்டித்துக்கொண்டது.
சூடான் மற்றும் எகிப்து ஆகிய நாடுகளும் ஆதரவளிப்பதாக எத்தியோப்பியா குற்றம்சாட்டிய போதிலும், இந்த மூன்று நாடுகளும் அதனை மறுத்துள்ளன.
