RCMP பொலிஸ் அதிகாரிகளின் மனநலத்தைப் பாதுகாப்பதற்குத் தற்காலிக மற்றும் அரைகுறைத் தீர்வுகளைத் தவிர்த்து, விரிவான மற்றும் நிலையான திட்டங்களை உடனடியாக அமல்படுத்த வேண்டும் என்று முன்வரிசைப் பொலிஸ் அதிகாரிகளைப் பிரதிநிதித்துவப்படுத்தும் தேசிய பொலிஸ் கூட்டமைப்பு (National Police Federation – NPF) வலியுறுத்தியுள்ளது.
ஒட்டாவாவில் நடைபெற்ற நிகழ்வொன்றில் “சீருடைக்கு பின்னால்” (Behind the Badge) என்ற தலைப்பிலான ஆய்வு அறிக்கையை தேசிய பொலிஸ் கூட்டமைப்பு வெளியிட்டது.
கனடாவின் தேசிய பொலிஸ் படையைச் சேர்ந்த உறுப்பினர்கள் பணிச்சூழலில் சந்திக்கும் கடுமையான மனஅழுத்தம், அதிர்ச்சி தரும் நிகழ்வுகள் மற்றும் ஆபத்தான சூழல்கள் குறித்து இந்த அறிக்கையில் சுட்டிக்காட்டப்பட்டுள்ளது.
குறிப்பாக, கியூபெக் உள்ளிட்ட பல்வேறு மாகாணங்களில் சேவையாற்றும் RCMP பொலிஸ் அதிகாரிகள், பணியின் போது எதிர்கொள்ளும் வன்முறை மற்றும் மன உளைச்சல்கள் காரணமாகப் பிந்தைய மனஉளைச்சல் சீர்கேடு (PTSD), மனச்சோர்வு (Depression), தீவிர பதற்றம் (Anxiety) போன்றப் பாதிப்புகளுக்கு உள்ளாகும் அபாயம் அதிகளவில் காணப்படுவதாகத் தெரிவிக்கப்பட்டுள்ளது.
தேசிய பொலிஸ் கூட்டமைப்பும் ரெஜினா பல்கலைக்கழகமும் (University of Regina) இணைந்து முன்னெடுத்த ஆய்வின் முடிவுகள் அறிக்கையில் சேர்க்கப்பட்டுள்ளன.
அதன்படி, சாதாரணப் பொதுமக்களுடன் ஒப்பிடும் போது, RCMP பொலிஸ் அதிகாரிகள் மனநலக் கோளாறுகளால் பாதிக்கப்படும் சாத்தியக்கூறு 6 மடங்கு அதிகமாக இருப்பது கண்டறியப்பட்டுள்ளது.
