2019ஆம் ஆண்டு இலங்கையை உலுக்கிய உயிர்த்த ஞாயிறு பயங்கரவாதத் தாக்குதல் சம்பவம் தொடர்பான முக்கிய வழக்கில், கொழும்பு நிரந்தர மூவரடங்கிய மேல்நீதிமன்றம் இன்று முக்கிய தீர்ப்பை வழங்கியுள்ளது.
வழக்கில் குற்றஞ்சாட்டப்பட்டிருந்த 24 பேரில், 15 பேர் குற்றவாளிகளாக அடையாளம் காணப்பட்டுள்ள நிலையில், அவர்களுக்கு தலா 220 வருட கடூழியச் சிறைத்தண்டனை விதித்து நீதிமன்றம் தீர்ப்பளித்துள்ளது.
மேலும், குற்றவாளிகளாகத் தீர்ப்பளிக்கப்பட்ட 15 பேருக்கும் சொந்தமான அசையும் மற்றும் அசையாச் சொத்துக்களை அரசுடமையாக்குவதற்கும் நீதிமன்றம் உத்தரவிட்டுள்ளது.
உயிர்த்த ஞாயிறு தாக்குதல்கள் தொடர்பாக, கொலை, பயங்கரவாதச் செயல்களுக்கு சதி செய்தல், பயங்கரவாத நடவடிக்கைகளுக்கு உதவி மற்றும் உடந்தையாக செயற்பட்டமை உள்ளிட்ட பல்வேறு குற்றச்சாட்டுகளின் அடிப்படையில் இந்த வழக்கு தொடரப்பட்டிருந்தது.
இந்த வழக்கில் மொத்தமாக 23 ஆயிரத்து 270 குற்றச்சாட்டுகள் முன்வைக்கப்பட்டிருந்தன. நீண்ட காலமாக இடம்பெற்ற இந்த வழக்கு விசாரணையின் போது, அரச தரப்பு சார்பில் 2 ஆயிரத்து 309 சாட்சிகள் சாட்சியமளித்திருந்தனர்.
கொழும்பு நிரந்தர மேல்நீதிமன்றத்தின் மூவரடங்கிய நீதிபதிகள் குழாம் முன்னிலையில் இந்த வழக்கு விசாரிக்கப்பட்டது.
2019ஆம் ஆண்டு ஏப்ரல் மாதம் 21ஆம் திகதி உயிர்த்த ஞாயிறு தினத்தன்று, தேவாலயங்கள் மற்றும் நட்சத்திர விடுதிகளை இலக்கு வைத்து நடத்தப்பட்ட தொடர் தற்கொலை குண்டுத் தாக்குதல்களில் 260க்கும் மேற்பட்டோர் உயிரிழந்ததுடன், நூற்றுக்கணக்கானோர் காயமடைந்தனர்.
கொழும்பு, நீர்கொழும்பு மற்றும் மட்டக்களப்பு உள்ளிட்ட பகுதிகளில் இடம்பெற்ற இந்தத் தாக்குதல்கள், இலங்கையின் அண்மைக்கால வரலாற்றில் மிகப்பெரும் பயங்கரவாத சம்பவங்களில் ஒன்றாகப் பதிவாகியுள்ளன.
இந்தத் தாக்குதல்களுடன் தொடர்புடையதாக பல்வேறு விசாரணைகள் முன்னெடுக்கப்பட்டதுடன், சந்தேகநபர்களுக்கு எதிராக நீண்டகாலமாக நீதிமன்ற நடவடிக்கைகளும் இடம்பெற்று வந்தன.
இந்நிலையில், தற்போது வழங்கப்பட்டுள்ள இந்தத் தீர்ப்பு, உயிர்த்த ஞாயிறு தாக்குதல் வழக்கின் முக்கிய நீதிமன்ற நடவடிக்கைகளில் ஒன்றாகக் கருதப்படுகிறது.
24 பேரில் 15 பேர் குற்றவாளிகள் என தீர்ப்பளிக்கப்பட்டுள்ள நிலையில், 9 பேர் விடுவிக்கப்பட்டுள்ளனர்.
குற்றவாளிகளாகத் தீர்ப்பளிக்கப்பட்டவர்களுக்கு தலா 220 வருட கடூழியச் சிறைத்தண்டனையும், அவர்களின் அசையும் மற்றும் அசையாச் சொத்துக்களை அரசுடமையாக்கும் உத்தரவும் நீதிமன்றத்தினால் பிறப்பிக்கப்பட்டுள்ளது.
உயிர்த்த ஞாயிறு தாக்குதலில் பாதிக்கப்பட்டவர்களுக்கும், அவர்களின் குடும்பங்களுக்கும் நீதி கிடைக்க வேண்டும் என்ற கோரிக்கைகள் பல ஆண்டுகளாக முன்வைக்கப்பட்டு வந்த நிலையில், இந்தத் தீர்ப்பு தற்போது வெளியாகியுள்ளது.
