சீனப் பொருளாதாரம் நடப்பு ஆண்டின் இரண்டாம் பாதியின் துவக்கத்திலேயே எதிர்பாராத பெரும் சரிவைச் சந்தித்துள்ளது. நாட்டின் பொருளாதார வல்லுநர்கள் கணித்த அளவைக் காட்டிலும் தொழிற்துறை உற்பத்தி மற்றும் சில்லறை விற்பனை ஆகிய இரண்டும் கணிசமாகக் குறைந்துள்ளன.
மோசமான காலநிலை மாற்றங்கள், வெள்ளப்பெருக்கு மற்றும் உள்நாட்டுச் சந்தையில் நுகர்வோர் தேவையில் தொடரும் பலவீனம் ஆகியவையே இந்த வீழ்ச்சிக்கு முதன்மை காரணங்களாகக் கருதப்படுகின்றன.
சீன தேசிய புள்ளியியல் வாரியம் வெளியிட்ட சமீபத்திய தரவுகளின்படி, கடந்த ஜூலை மாதத்தில் நாட்டின் தொழிற்துறை உற்பத்தி வளர்ச்சி 4.5 சதவீதமாகக் குறைந்துள்ளது. இது ஜூன் மாதத்தில் பதிவான 5.3 சதவீத வளர்ச்சியை விடவும், நிபுணர்கள் எதிர்பார்த்த 4.8 சதவீதத்தை விடவும் மிகக் குறைவாகும்.
அதேவேளையில், நுகர்வோர் செலவிடும் திறனைப் பிரதிபலிக்கும் சில்லறை விற்பனை ஜூன் மாதத்தில் 1 சதவீதமாக இருந்த நிலையில், ஜூலையில் வெறும் 0.6 சதவீதம் மட்டுமே உயர்ந்துள்ளது. கோடைகால பயணங்கள் அதிகரித்தபோதிலும், மக்களின் வாங்கும் திறன் பெரிய அளவில் மேம்படவில்லை என்பதை இந்தத் தரவுகள் உணர்த்துகின்றன.
மேலும், நாட்டின் பொருளாதாரத் தூணாக விளங்கும் ரியல் எஸ்டேட் துறை இன்னும் மீள முடியாத நெருக்கடியில் நீடிக்கிறது. நிலையான சொத்துகள் மீதான முதலீடு முதல் ஏழு மாதங்களில் 6.7 சதவீதம் வரை சரிவடைந்துள்ளது.
சீனாவின் முக்கிய உற்பத்தி மையங்களைத் தாக்கிய தொடர் சூறாவளிகள், கனமழை போன்ற இயற்கை பேரிடர்களும், அமெரிக்காவின் வர்த்தகக் கட்டுப்பாடுகளும் ஏற்றுமதியை வெகுவாகப் பாதித்துள்ளன.
இந்தச் சூழலைச் சமாளிக்கவும், உள்நாட்டு நுகர்வை உயர்த்தவும் அரசு உடனடியாக நிதியுதவி மற்றும் வரிச்சலுகை திட்டங்களை விரைவுபடுத்த வேண்டும் எனப் பொருளாதார வல்லுநர்கள் வலியுறுத்தி வருகின்றனர்.
