மொன்றியல் மாநகர மத்தியில் அமைந்துள்ள வரலாற்றுச் சிறப்புமிக்க எக்கோல் டெஸ் பியூக்ஸ்-ஆர்ட்ஸ் (École des Beaux-Arts) கட்டடம் முழுமையாகப் புதுப்பிக்கப்பட்டு பிரம்மாண்டமான கலாசார மையமாக மாற்றப்படவுள்ளது.
நாட்டில் வாழும் கறுப்பின மக்களின் கலை, கலாசாரம் மற்றும் வரலாற்றுப் பாரம்பரியங்களைப் பாதுகாத்து மேம்படுத்துவதற்காகவே, இந்த நடவடிக்கை மேற்கொள்ளப்படவுள்ளது.
நாட்டில் வாழும் ஒட்டுமொத்தக் கறுப்பினச் சமூகங்களையும் ஒன்றிணைக்கும் நோக்கில் உருவாக்கப்படும் இந்த மையத்திற்கு, கூட்டாட்சி அரசாங்கம் மற்றும் பல்வேறு துறைகளின் பங்களிப்புடன் நிதி ஒதுக்கீடுகள் செய்யப்பட்டுள்ளன.
மொன்றியலின் செயின்ட்-அர்பைன் (Saint-Urbain) வீதியில் அமைந்துள்ள நூற்றாண்டுப் பாரம்பரியம் மிக்க முன்னாள் நுண்கலைக் கல்லூரி (École des Beaux-Arts) கட்டடமே, இதற்காகத் தெரிவு செய்யப்பட்டுள்ளது.
புதுப்பிக்கப்பட்ட பின்னர், அது நாட்டின் மிகப்பெரிய ஆபிரிக்க-கனேடிய கலாசார மையமாக உருவெடுக்கவுள்ளது. இத்திட்டத்திற்காகக் கனேடிய மரபுரிமைத் துறை (Canadian Heritage) மற்றும் கூட்டாட்சி சுற்றுச்சூழல் துறை ஆகியவற்றின் ஊடாக, பெருந்தொகை நிதி முதலீடு செய்யப்பட்டுள்ளது. இந்த ஆபிரிக்க-கனேடிய கலாசார மையமானது கறுப்பினக் கலைஞர்களின் ஆற்றலை வெளிப்படுத்தவும், கறுப்பின மக்களின் வரலாற்றை ஆவணப்படுத்தும் காப்பகமாகவும், அனைத்துப் பொதுமக்களுக்குமான பல்லினக் கலாசாரப் பரிமாற்றத் தளமாகவும் இயங்கும் என அதிகாரப்பூர்வமாக அறிவிக்கப்பட்டுள்ளது.
