கனடாவின் புகழ்பெற்ற வானூர்தி சாகச அணியான Canadian Forces Snowbirds, 2026 ஆம் ஆண்டின் விமானக் காட்சி பருவத்திற்குப் பிறகு தற்காலிகமாக செயல்பாடுகளை நிறுத்தவுள்ளதாக கனடிய அரசு அறிவித்துள்ளது.
இதன்படி தற்போது பயன்படுத்தப்படும் CT-114 Tutor ஜெட் விமானங்கள் சேவைக்காலத்தின் இறுதிக்கட்டத்தை எட்டியிருப்பதால் இந்த அறிவித்தல் விடுக்கப்பட்டுள்ளது.
1971 ஆம் ஆண்டு முதல் ஸ்னோபேர்ட்ஸ் அணியின் அடையாளமாக விளங்கிய CT-114 Tutor விமானங்கள், 1960களில் சேவையில் அறிமுகப்படுத்தப்பட்டவையாகும் . ஆறு தசாப்தங்களுக்கும் மேலாக பயன்படுத்தப்பட்டுள்ள இந்த விமானங்களை பாதுகாப்பு காரணங்களால் ஓய்வுபடுத்த வேண்டிய நிலை ஏற்பட்டுள்ளதாக ராயல் கனடியன் விமானப்படை தெரிவித்துள்ளது.
இதில் பாதுகாப்புத்துறை அமைச்சர் David McGuinty அறிவித்ததன்படி, 2026 பருவம் ஸ்னோபேர்ட்ஸ் அணியின் தற்போதைய விமானங்களுடனான கடைசி நிகழ்ச்சி பருவமாக இருக்கும் எனவும் அதன் பின்னர் புதிய CT-157 Siskin II விமானங்கள் பெறப்பட்டு செயல்பாட்டுக்கு வரும் வரை, 2030களின் தொடக்கம் வரை அணியின் விமானக் காட்சிகள் இடைநிறுத்தப்படலாம் என தெரிவிக்கப்பட்டுள்ளது.
இந்த முடிவுக்கு எதிராக, ஸ்னோபேர்ட்ஸ் அணியின் முன்னாள் விமானிகள் மற்றும் முன்னாள் கட்டளை அதிகாரிகள் அதிருப்தி வெளியிட்டுள்ளனர். அவர்கள், அணியை முழுமையாக நிறுத்துவதற்குப் பதிலாக குறைந்த எண்ணிக்கையிலான விமானங்களுடன் அல்லது குறைக்கப்பட்ட நிகழ்ச்சிகளுடன் தொடர்ந்து செயல்படுத்தும் மாற்று வழிகளை அரசு பரிசீலிக்க வேண்டும் என வலியுறுத்தியுள்ளனர்.
மேலும், இந்த அணியின் நிகழ்ச்சிகள் கனடிய ஆயுதப்படைகளுக்கான ஆட்சேர்ப்பை ஊக்குவிப்பதிலும், நாட்டின் விமானப்படை மரபை வெளிப்படுத்துவதிலும் முக்கிய பங்கு வகிப்பதாக எதிர்க்கட்சியினர் மற்றும் விமான ஆர்வலர்கள் கூறுகின்றனர்.
ஸ்னோபேர்ட்ஸ் அணி இதுவரை ஆயிரக்கணக்கான வானூர்தி நிகழ்ச்சிகளில் பங்கேற்று, வட அமெரிக்கா முழுவதும் கோடிக்கணக்கான மக்களை கவர்ந்துள்ளது. 2026 ஆம் ஆண்டு நடைபெறவுள்ள 55வது ஆண்டு நினைவு பருவம், தற்போதைய Tutor விமானங்களுக்கான பிரியாவிடை பருவமாகவும் அமையவுள்ளமை குறிப்பிடத்தக்கது.
