கனடியப் பொருட்களுக்கு எதிராக விதிக்கப்பட்டுள்ள அமெரிக்காவின் வர்த்தக வரிகள் (Tariffs) நிரந்தரமானவை என்றும், அது குறித்து கனேடியர்கள் காட்டிவரும் அதிருப்தியைத் தாம் பொருட்படுத்தப் போவதில்லை என்றும் கனடாவுக்கான அமெரிக்கத் தூதுவர் பீட் ஹுக்ஸ்ட்ரா (Pete Hoekstra) திட்டவட்டமாகத் தெரிவித்துள்ளார். கனடா இந்த புதிய பொருளாதார யதார்த்தத்தை ஒப்புக்கொண்டு முன்னோக்கி நகர வேண்டும் என்றும் அவர் வலியுறுத்தியுள்ளார்.
அமெரிக்க அதிபர் டொனால்ட் ட்ரம்பின் நெருங்கிய நண்பரும் கனடாவுக்கான அமெரிக்கத் தூதுவருமான பீட் ஹுக்ஸ்ட்ரா ஒட்டாவாவில் அமைந்துள்ள அமெரிக்கத் தூதரகத்தில், ஊடகமொன்றுக்கு வழங்கிய விசேட நேர்காணலின் போதே, இந்த கருத்துக்களை வெளியிட்டுள்ளார். அமெரிக்காவின் உலகளாவிய வர்த்தகக் கொள்கையிலிருந்து கனடாவுக்கு எந்தவொரு விதிவிலக்கும் வழங்கப்பட மாட்டாது என்பதை அவர் தெளிவுபடுத்தினார்.
அமெரிக்கா உலகிலுள்ள அனைத்து நாடுகளின் மீதும் வர்த்தக வரிகளை விதித்துள்ளது எனவும் அமெரிக்காவின் நலன்களைப் பாதுகாப்பதற்காக சில நடவடிக்கைகளை எடுத்தே தீர வேண்டியுள்ளது எனவும் பீட் ஹுக்ஸ்ட்ரா குறிப்பிட்டுள்ளார்.
அமெரிக்காவின் வர்த்தக வரிகளுக்குப் பதிலடி கொடுக்கும் வகையில், நாட்டின் பெரும்பாலான மாகாணங்களும் மூன்று பிராந்தியங்களும் இணைந்து, அங்குள்ள மதுபானக் கடைகளின் அமெரிக்க மதுபானப் பொருட்களை காட்சிப்படுத்துவதை நிறுத்தியிருந்தன. இந்த நடவடிக்கை குறித்து அமெரிக்கத் தூதுவர் தனது கடுமையான அதிருப்தியை வெளிப்படுத்தியுள்ளமை குறிப்பிடத்தக்கது.
