மொன்றியலின் செயிண்ட்-லாரன்ட் (Saint-Laurent) பகுதியில் நேற்று இரவு நிகழ்ந்த துப்பாக்கிச் சூட்டில் 21 வயது இளைஞர் ஒருவர் காயமடைந்துள்ளதாகப் பொலிஸார் தெரிவித்துள்ளனர்.
நேற்று இரவு 11:30 மணியளவில் கோட்-வெர்டு (Côte-Vertu) வீதி மற்றும் பெகின் (Bégin) வீதி சந்திப்பில் இந்தச் சம்பவம் நிகழ்ந்துள்ளது.
துப்பாக்கிச் சத்தம் கேட்டதாகப் பொதுமக்கள் வழங்கிய தகவலின் பேரில் சம்பவ இடத்திற்கு விரைந்த பொலிஸார், காலில் துப்பாக்கிக் குண்டு காயத்துடன் இருந்த இளைஞரை மீட்டனர்.
அவர் உடனடியாக மருத்துவமனையில் அனுமதிக்கப்பட்டுள்ளார். தற்போது அவர் உயிருக்கு ஆபத்தான நிலையில் இல்லை என மருத்துவர்கள் உறுதிப்படுத்தியுள்ளனர்.
பாதிக்கப்பட்ட இளைஞர் நடைபாதையில் நடந்து சென்றபோது, அவ்வழியாக வந்த மர்ம நபர்கள் அவர் மீது துப்பாக்கிப் பிரயோகம் மேற்கொண்டுவிட்டுத் தப்பிச் சென்றுள்ளதாக, முதற்கட்ட விசாரணையில் தெரியவந்துள்ளது.
