கியூபெக் மாகாணத்தின் 33-வது முதல்வராக கிறிஸ்டின் ஃப்ரெச்செட் (Christine Fréchette) உத்தியோகபூர்வமாகப் பதவியேற்றுக் கொண்டார்.
கியூபெக் மாகாண வரலாற்றில் இந்தப் பொறுப்பை ஏற்கும் இரண்டாவது பெண்மணி என்ற பெருமையை இவர் பெற்றுள்ளார். மொன்றியல் வர்த்தக சபையின் தலைவராகப் பணியாற்றிய அனுபவம் கொண்ட இவர், கடந்த நான்கு ஆண்டுகளில் குடிவரவுத் துறை மற்றும் பொருளாதாரத் துறை அமைச்சராகத் திறம்படப் பணியாற்றினார்.
2011-ஆம் ஆண்டில் CAQ கட்சி தொடங்கப்பட்டது முதல் தலைவராக இருந்த பிரான்சுவா லெகோவின் (François Legault) பதவி விலகலைத் தொடர்ந்து, இன்று புதிய தலைமை மாற்றம் நிகழ்ந்துள்ளது. இன்று மாலை 4:00 மணிக்கு இந்தப் பதவியேற்பு விழா நடைபெற்றது.
தற்போது அவர் முழு அதிகாரத்துடன் கியூபெக் மாகாணத்தின் முதல்வராகப் பொறுப்பேற்றுள்ளார். அடுத்த ஆறு மாதங்களில் கியூபெக்கில் பொதுத்தேர்தல் நடைபெறவுள்ள நிலையில், கிறிஸ்டின் ஃப்ரெச்செட்டின் இந்தத் தலைமை மாற்றம் மாகாண அரசியலில் பெரும் எதிர்பார்ப்பை ஏற்படுத்தியுள்ளது.
