நிலவை நோக்கிய வரலாற்றுச் சிறப்புமிக்க பயணத்தில் ஈடுபட்டுள்ள கனேடிய விண்வெளி வீரர் ஜெரமி ஹான்சன் (Jeremy Hansen), விண்வெளியில் இருந்து பூமியுடன் நடத்திய முதல் நேரடி உரையாடலின் போது கனேடியர்களுக்கு ஊக்கமளிக்கும் செய்தி ஒன்றை வழங்கியுள்ளார்.
“2026-ஆம் ஆண்டில் ஒரு மனிதனை எம்மால் நிலவுக்கு அனுப்ப முடியுமானால், எதிர்காலத்தில் நாம் எதனைத்தான் சாதிக்க முடியாது?” என அவர் விண்வெளியில் மிதந்தபடி கனேடியர்களிடம் கேள்வி எழுப்பினார்.
அமெரிக்காவின் விண்வெளி ஆய்வு நிறுவனமான நாசா அமைப்பின் (NASA) ‘ஆர்டெமிஸ் II’ (Artemis II) விண்கலத்தில் பயணம் செய்யும் நான்கு வீரர்களில் ஒருவரான ஜெரமி ஹான்சன், நிலவு வரை செல்லும் முதல் கனேடியர் என்ற பெருமையைப் பெறுகிறார்.
அமெரிக்க விண்வெளி வீரர்களுடன் இணைந்து பயணிக்கும் இவர், இந்தப் பயணம் சர்வதேச ஒத்துழைப்பிற்கும் மனிதகுலத்தின் விடாமுயற்சிக்கும் ஒரு சிறந்த உதாரணம் எனத் தெரிவித்தார்.
கியூபெக் மாகாணத்தின் பிரசித்தி பெற்ற ‘மேப்பிள் சிரப்’ (Maple syrup) தமது விண்கலத்தில் மறைத்து வைக்கப்பட்டுள்ளதாகவும் தாம் அந்த ‘மேப்பிள் சிரப்பை’ தற்போது தேடி வருவதாகவும் அவர் நகைச்சுவையாகக் குறிப்பிட்டார்.
1972-ஆம் ஆண்டிற்குப் பிறகு நிலவுக்கு மனிதர்களை அழைத்துச் செல்லும் முதல் சோதனை முயற்சி இது என்பது குறிப்பிடத்தக்கது.
