கியூபெக் மாகாணத்தில் பெட்ரோல் விலை ஒரு லீற்றருக்கு 2 டொலர்களை நெருங்கி வரும் நிலையில், பொதுமக்கள் மலிவான விலையில் எரிபொருளைப் பெற்றுக் கொள்ள உதவும் வகையில் புதிய ‘நிகழ்நேர எரிபொருள் விலைக்கான வரைபடத்தை’ (Real-time Gas Map) கியூபெக் மாகாண அரசு அறிமுகப்படுத்தியுள்ளது.
“Régie Essence Québec” எனப் பெயரிடப்பட்டுள்ள இந்த இணையதளக் கருவி, கியூபெக் மாகாணம் முழுவதிலும் உள்ள சுமார் 2,500 எரிபொருள் நிலையங்களின் விலைப் பட்டியலை உடனுக்குடன் வழங்குகிறது.
இதுவரை பொதுமக்கள் பயன்படுத்தி வந்த மற்றைய செயலிகளைப் போலல்லாமல், இந்த புதிய வரைபடம் சட்டப்பூர்வமான வலுவைக் கொண்டுள்ளது.
எரிபொருள் விற்பனையாளர்கள் தங்களது நிலையங்களில் விலையை மாற்றிய உடனே, இந்த இணையதளத்திலும் அதனைப் பதிவேற்ற வேண்டும் என்பது இனி சட்டப்படி கட்டாயமானது எனத் தெரிவிக்கப்பட்டுள்ளது.
இதன் மூலம் கியூபெக் மாகாணத்தின் மக்கள் தவறான தகவல்களைத் தவிர்த்து, மிகவும் துல்லியமான விலைப் பட்டியலை அறிந்து கொள்ள முடியும்.
தற்போது, மொன்றியல் நகரின் பல பகுதிகளில் ஒரு லீற்றர் பெட்ரோல் 1.93 முதல் 1.95 டொலர் வரை விற்பனை செய்யப்படுகிறது.
நகரின் சில இடங்களில் இது ஏற்கனவே 2.30 டொலர்களைத் தாண்டியுள்ளமை குறிப்பிடத் தக்கது.
