காதலர் தினத்தை முன்னிட்டு இணையவழித் தேடல்களில் ஈடுபடுபவர்களைக் குறிவைத்து, சுமார் கால் மில்லியன் டொலர் மோசடி செய்த மிசிசாகா (Mississauga) நகரத்தைச் சேர்ந்த ஒரு ஆணும் பெண்ணும் டொராண்டோ காவல்துறையினரால் கைது செய்யப்பட்டுள்ளனர்.
கைது செய்யப்பட்டவர்கள் 36 வயது சார்லஸ் ஆசி (Charles Azi) மற்றும் 42 வயது பாட்ரிசியா ஆசி (Patricia Azi) என அடையாளம் காணப்பட்டுள்ளனர்.
இவர்கள் ‘புராஜெக்ட் மிஸ்மேட்ச்’ (Project Mismatch) என்ற ரகசியக் காவல் விசாரணையின் மூலம் பிடிபட்டனர்.
சார்லஸ் ஆசி என்பவர் ‘ஹ்ரோனெக் ராட்கோ’ (Hronek Radko) என்ற போலிப் பெயரில், வேறொரு நபரின் புகைப்படத்தைப் பயன்படுத்தி டேட்டிங் செயலிகளில் தம்மை முன்னிறுத்தியுள்ளார்.
தன்னை டொராண்டோவின் மிகப்பெரிய தொழிலதிபர் என்றும், ‘ஓஷன் ஆட்டோ’ (Ocean Auto) என்ற நிறுவனத்தை நடத்தி வருவதாகவும் கூறி பெண்களிடம் பழகியுள்ளார்.
கனடா மற்றும் அமெரிக்கா முழுவதும் பலரை ஏமாற்றியுள்ள இவர்களால் இதுவரை 250,000 டொலர் வரை இழப்பு ஏற்பட்டுள்ளதாகக் காவல்துறையினர் நம்புகின்றனர்.
