துணை அமைச்சர்கள் மட்டத்தில் மாற்றங்களை அறிவித்துள்ளார் பிரதமர் மார்க் கார்னி.

பிரதமர் மார்க் கார்னி (Mark Carney), நாட்டின் 'துணை அமைச்சர்கள் (Deputy Ministers) மட்டத்தில் மிகப்பெரிய மாற்றங்களை  அறிவித்துள்ளார்.

2025-ஆம் ஆண்டின் இறுதியில் மேற்கொள்ளப்பட்டுள்ள இந்த நடவடிக்கை, அரசு நிர்வாகத்தில் பிரதமரின் தனிப்பட்ட முத்திரையைப் பதிக்கும் முயற்சியாகப் பார்க்கப்படுகிறது. இந்த மாற்றத்தின் மூலம் 12 உயர்மட்ட அதிகாரிகள் புதிய பொறுப்புகளை ஏற்றுள்ளனர், மேலும் 8 மூத்த அதிகாரிகள் பணியிலிருந்து ஓய்வுபெறுகின்றனர்.

நாட்டின் பொருளாதாரம், பாதுகாப்பு மற்றும் நீதித்துறை ஆகியவற்றில் பிரதமர் கார்னி தமக்கு நெருக்கமான மற்றும் திறமையான அதிகாரிகளை
நியமித்துள்ளார். கனடா வங்கியின் (Bank of Canada) கொள்கை இயக்குநராக இருந்த நிக் லெஸ்விக் (Nick Leswick), நிதித்துறையின் புதிய துணை அமைச்சராக
நியமிக்கப்பட்டுள்ளார். வெளிநாட்டுத் தலையீடுகள் குறித்த விசாரணையை முன்னின்று நடத்திய நீதிபதி மேரி-ஜோஸ் ஹோக் (Marie-Josée Hogue), நீதித்துறை துணை அமைச்சராகவும், துணை அட்டர்னி ஜெனரலாகவும் பொறுப்பேற்கிறார். நேட்டோ (NATO) நாடுகளுக்கான பாதுகாப்புச் செலவினங்களை அதிகரிக்கும் நோக்கில், அனுபவம் வாய்ந்த கிறிஸ்டியன் ஃபாக்ஸ் (Christiane Fox) பாதுகாப்புத் துறை துணை அமைச்சராக நியமிக்கப்பட்டுள்ளார்.

கனடா மக்களுக்கான முடிவுகளை விரைவாகவும், சரியாகவும் கொண்டு செல்வதை உறுதி செய்யவே இந்த மாற்றங்கள் செய்யப்பட்டுள்ளன என்று
பிரதமரின் அலுவலகம் தெரிவித்துள்ளது.