வடக்கு கியூபெக் பிராந்தியமான நுனாவிக்கில் (Nunavik) பொலிஸாரின் துப்பாக்கிச் சூட்டுச் சம்பவங்களால் இன்யூட் (Inuit) மக்களுக்கும் பொலிஸ் சேவைக்கும் இடையே ஏற்பட்டுள்ள நம்பிக்கையின்மையைப் போக்கும் நோக்கில், சமூகப் பணியாளர்களையும் பொலிஸ் அதிகாரிகளையும் இணைத்துச் செயற்படும் ‘சகிஜுக்’ (Saqijuq) நடமாடும் தலையீட்டுக் குழுக்கள் (MIT) விரிவுபடுத்தப்பட்டு வருகின்றன.
பொலிஸாரின் தலையீடு, கைதுகள் மற்றும் பலப்பிரயோகம் ஆகியவற்றைக் குறைக்கும் நோக்கில், இன்யூட் மக்களால் வழிநடத்தப்படும் சகிஜுக் அமைப்பு இந்தத் திட்டத்தை முன்னெடுத்துள்ளது.
2019 ஆம் ஆண்டு ஆரம்பிக்கப்பட்ட இத்திட்டம், புவிர்னிதுக் (Puvirnituq), குஜுவாக் (Kuujjuaq) மற்றும் அண்மையில் சல்லூயிட் (Salluit) ஆகிய பகுதிகளில் விஸ்தரிக்கப்பட்டுள்ளது.
தற்கொலைத் தடுப்பு, குடும்ப வன்முறை, உளநல நெருக்கடிகள் மற்றும் ஆபத்தான சூழலில் உள்ள சிறுவர்களின் பாதுகாப்பு ஆகிய விவகாரங்களில் இக்குழு கவனம் செலுத்துகிறது.
கடந்த காலங்களில் இடம்பெற்ற பொலிஸ் துப்பாக்கிச் சூட்டுச் சம்பவங்கள் இப்பகுதி மக்களிடையே கடும் கொந்தளிப்பை ஏற்படுத்தியிருந்தன.
2024 ஆம் ஆண்டு நவம்பர் 4 ஆம் திகதி பொலிஸாரின் துப்பாக்கிச் சூட்டில் 26 வயதான ஜோசுவா பாபிகாடுக் (Joshua Papigatuk) உயிரிழந்ததுடன், அவரது இரட்டைச் சகோதரர் கார்னெட் படுகாயமடைந்தார்.
இச்சம்பவத்திற்கு எதிராக கியூபெக் மாகாணம் முழுவதும் போராட்டங்கள் முன்னெடுக்கப்பட்டன.
இதேபோல், கங்கிக்சுவாலுஜுவாக் (Kangiqsualujjuaq) பகுதியில் பொலிஸ் துப்பாக்கிச் சூட்டில் உயிரிழந்த மார்க் ஆர். அன்னனாக் (Mark R. Annanack) என்பவரின் குடும்பத்தினரும் பொலிஸ் சேவையில் மாற்றங்களைக் கோரி வந்தனர்.
இந்நிலையில், இம்மாதம் கியூபெக் மாகாண முதல்வர் பிளமண்டன் மற்றும் அமைச்சர்களுக்கு பாதிக்கப்பட்ட இரு குடும்பத்தினரும் அனுப்பியுள்ள அறிக்கையில், “உள்ளூர் நீதி மற்றும் பொலிஸ் சேவைகளை முழுமையாக மறுசீரமைக்க உடனடியாக நிதி ஒதுக்கீடு செய்ய வேண்டும்” என வலியுறுத்தியுள்ளமை குறிப்பிடத்தக்கது.
