நியூ பிரன்சுவிக் மாகாணத்தில் சுகாதாரப் பராமரிப்பை மேம்படுத்துவதற்கான முதல்வர் சூசன் ஹோல்டின் நடவடிக்கைகள் முன்னேற்றத்தைக் காட்டத் தொடங்கியுள்ளதாக புதிய தகவல்கள் தெரிவிக்கின்றன.
கடந்த ஒக்டோபர் மாதத்தில் மாத்திரம், மேலதிகமாக 6,768 பேர் குடும்ப மருத்துவர் உள்ளிட்ட முதன்மை சுகாதார சேவைகளுடன் இணைக்கப்பட்டுள்ளனர். இதன்மூலம் முதன்மை சுகாதார சேவையைப் பெறுவோரின் எண்ணிக்கை 70.2 சதவீதத்திலிருந்து 70.9 சதவீதமாக அதிகரித்துள்ளது.
இதற்கிடையில், அபாகஸ் டேட்டா நடத்திய கருத்துக் கணிப்பில், சுகாதார சேவைகளை மேம்படுத்துவதில் அரசாங்கத்தின் செயல்பாட்டுக்கு 36 சதவீத மக்கள் ஆதரவு தெரிவித்துள்ளனர். கடந்த ஜூலை மாதம் இந்த ஆதரவு 29 சதவீதமாக இருந்தது.
மேலும், கட்சிகளுக்கான மக்கள் ஆதரவில் சூசன் ஹோல்டின் லிபரல் கட்சி 44 சதவீதத்துடன் முன்னிலை வகிப்பதாகவும், முற்போக்கு கன்சர்வேட்டிவ் கட்சி 32 சதவீதத்தையும், பசுமைக் கட்சி 16 சதவீதத்தையும் பெற்றுள்ளதாகவும் கருத்துக் கணிப்பு தெரிவிக்கிறது.
எவ்வாறாயினும், 2028ஆம் ஆண்டுக்குள் மாகாண மக்களில் 85 சதவீதமானோருக்கு முதன்மை சுகாதார சேவையை உறுதிப்படுத்தும் இலக்கை அடைவதற்கு அரசாங்கம் இன்னும் பல நடவடிக்கைகளை முன்னெடுக்க வேண்டியுள்ளதாகவும் தெரிவிக்கப்பட்டுள்ளது.
