சஸ்கட்சுவான் மாகாணம் சஸ்கட்டூன் நகரில் இடம்பெற்ற கோர விபத்தில் 27 வயதான இளைஞர் ஒருவர் உயிரிழந்துள்ளார்.
Highway 16 மற்றும் Boychuk Drive சந்திப்புக்கு அருகில் உள்ள மேம்பாலத்தில் இன்று அதிகாலை சுமார் 2.30 மணியளவில் இந்த விபத்து இடம்பெற்றுள்ளது.
தகவல் கிடைத்ததும் சம்பவ இடத்துக்கு விரைந்த தீயணைப்புப் படையினர், மேம்பாலத்தில் ஒரு வாகனம் முழுமையாக தீப்பற்றி எரிந்த நிலையில் காணப்பட்டதாக தெரிவித்துள்ளனர்.
தீயணைப்புப் படையினர் உடனடியாக நீர் குழாய்களைப் பயன்படுத்தி தீயை கட்டுப்படுத்தியதுடன், அந்தப் பகுதியில் வேறு யாரும் விபத்தில் சிக்கியுள்ளார்களா என்பதையும் தேடியுள்ளனர்.
காலை 6.46 மணியளவில் தீ முழுமையாக அணைக்கப்பட்டதாகவும், பொதுமக்கள் அல்லது தீயணைப்புப் படையினருக்கு வேறு எந்த காயங்களும் ஏற்படவில்லை என்றும் தெரிவிக்கப்பட்டுள்ளது.
சஸ்கட்டூன் பொலிஸார், இந்த விபத்தில் 27 வயதான சஸ்கட்டூன் நகரைச் சேர்ந்த ஆண் ஒருவர் உயிரிழந்துள்ளதாக உறுதிப்படுத்தியுள்ளனர்.
விபத்து காரணமாக Highway 16 இன் கிழக்கு மற்றும் மேற்கு நோக்கிய பாதைகளில் போக்குவரத்துக் கட்டுப்பாடுகள் விதிக்கப்பட்டுள்ளன.
விபத்து தொடர்பான மேலதிக விசாரணைகளை பொலிஸார் முன்னெடுத்து வருகின்றனர்.
