கனடாவில் 2020ஆம் ஆண்டு அறிமுகப்படுத்தப்பட்ட தாக்குதல் பாணித் துப்பாக்கிகளுக்கான தடையை எதிர்த்து முன்வைக்கப்பட்ட சட்டச் சவால் தொடர்பான விசாரணைகள் கனடாவின் உச்ச நீதிமன்றத்தில் முன்னெடுக்கப்பட்டுள்ளன.
இன்று 10ஆம் திகதி இந்த வழக்கின் இறுதி நாள் வாதங்கள் இடம்பெருக்கின்றன.
2020ஆம் ஆண்டு அப்போதைய மத்திய அரசாங்கம் சுமார் 1,500 வகையான துப்பாக்கிகள் மற்றும் அவற்றின் மாறுபாடுகளைத் தடை செய்திருந்தது. பின்னர் இந்தப் பட்டியல் 2,500க்கும் அதிகமான வகைகளாக விரிவுபடுத்தப்பட்டது.
AR-15 உள்ளிட்ட துப்பாக்கிகளும் இந்தத் தடையின் கீழ் கொண்டுவரப்பட்டிருந்தன. இந்தத் தடைக்கு எதிராக துப்பாக்கி உரிமையாளர்கள், வணிக நிறுவனங்கள் மற்றும் விளையாட்டுத் துப்பாக்கிச் சுடுதல் அமைப்புகள் உள்ளிட்ட தரப்புகள் சட்ட நடவடிக்கையை முன்னெடுத்துள்ளன.
அரசாங்கம் பொதுமக்களின் பாதுகாப்பைக் கருத்திற்கொண்டு இந்த நடவடிக்கை எடுக்கப்பட்டதாக கூறியுள்ளது.ஆனால், துப்பாக்கி உரிமையாளர்கள் தரப்பினர் அரசாங்கம் தனது சட்ட அதிகார வரம்பை மீறியுள்ளதாகக் கூறுகின்றனர்.
இந்த வழக்கில் உச்ச நீதிமன்றம் வழங்கும் தீர்ப்பு, எதிர்காலத்தில் கனடாவில் துப்பாக்கி கட்டுப்பாட்டுச் சட்டங்கள் எவ்வாறு நடைமுறைப்படுத்தப்படும் என்பதில் முக்கிய தாக்கத்தை ஏற்படுத்தக்கூடும் என எதிர்பார்க்கப்படுகிறது.
