முல்லைத்தீவு மகா வித்தியாலயம் ஏற்பாடு செய்திருந்த 2026ஆம் ஆண்டுக்கான பரிசில் தினம் இன்று (04) வெகு சிறப்பாக நடைபெற்றது.
விழாவின் விருந்தினர்கள் இன்னிய வாத்திய அணியின் இசை முழக்கத்துடன், மலர்மாலை அணிவித்து, பாடசாலைச் சமூகத்தினரால் வரவேற்று அழைத்து வரப்பட்டனர்.
இதனைத் தொடர்ந்து, பிரத்தியேகமாக அமைக்கப்பட்ட பிரமாண்டமான அலங்கார அரங்கில் மங்கல விளக்கேற்றலுடன் விழா சம்பிரதாயபூர்வமாக ஆரம்பமானது.
தொடர்ந்து வரவேற்பு நடனம் மற்றும் வரவேற்புரை இடம்பெற்றதையடுத்து, பாடசாலை அதிபர் சி. மோகஜீவன் அவர்களின் தலைமையுரை இடம்பெற்றது . அதனைத் தொடர்ந்து முல்லைத்தீவு வலயக் கல்விப் பணிப்பாளர் அ சிவனருள்ராஜா அவர்களின் சிறப்புரையும் இடம்பெற்றது.
விழாவின் முக்கிய அம்சமாக மாணவர்களின் திறமைகளையும் ஆற்றல்களையும் வெளிப்படுத்தும் வகையில் பல்வேறு கலைநிகழ்வுகள் அரங்கேற்றப்பட்டன.
இதனையடுத்து, கல்வியிலும் விளையாட்டு உள்ளிட்ட இணைபாடவிதான செயற்ப்பாட்டிலும் சாதித்த மாணவர்களுக்கு பரிசில்களும் சான்றிதழ்களும் வழங்கி கௌரவிக்கப்பட்டனர்.
பாடசாலை மாணவர்கள் ஆசிரியர்கள், பெற்றோர்கள், பழைய மாணவர்கள் மற்றும் அழைக்கப்பட்ட விருந்தினர்கள் எனப் பெருமளவிலானோர் கலந்துகொண்ட இவ்விழா, மாணவர்களின் சாதனைகளைக் கொண்டாடும் மகிழ்ச்சிகரமான நிகழ்வாக அமைந்தது.
மாணவர்களின் திறமைகளை அங்கீகரித்து, அவர்களின் எதிர்கால இலக்குகளை நோக்கிய பயணத்துக்கு ஊக்கமளிக்கும் வகையில் இந்தப் பரிசளிப்பு விழா சிறப்பாக நிறைவடைந்தது.
