யாழ்ப்பாணம் கந்தரோடையில் தொல்லியல் திணைக்களத்தினரின் கட்டுப்பாட்டில் உள்ள புராதன பௌத்த சின்னங்கள் அமைந்துள்ள பகுதியில் புதிதாக வைக்கப்பட்டிருந்த புத்தர் சிலை மீள எடுத்து செல்லப்பட்டுள்ளதாக , வலி.தெற்கு பிரதேச சபை தவிசாளர் தி. பிரகாஷ் தெரிவித்துள்ளார்.
சுன்னாகம் கந்தரோடை பகுதியில் புராதன பௌத்த சின்னங்கள் காணப்படும் பகுதியில் கடந்த சனிக்கிழமை தென்னிலங்கையில் இருந்து அழைத்து வரப்பட்ட பௌத்தர்கள் புத்தர் சிலை ஒன்றினை அங்கு வைத்து வழிபாடுகளை மேற்கொண்டதுடன்,”பிரித்” ஓதி மத சடங்குகளிலும் ஈடுபட்டனர்.
குறித்த சம்பவமானது பெரும் சர்ச்சையை ஏற்படுத்தியதுடன் , அப்பகுதி மக்கள் மத்தியில் குழப்பங்களையும் ஏற்படுத்தி இருந்தன.
இந்நிலையில் குறித்த பகுதிக்கு இன்றைய தினம் செவ்வாய்க்கிழமை வலி.தெற்கு பிரதே சபையின் தவிசாளர் தி.பிரகாஷ் நேரில் சென்று பார்வையிட்ட போது, அன்றைய தினம் சனிக்கிழமை வழிபாட்டிற்காகவே அங்கு புத்தர் சிலை வைக்கப்பட்டது என்றும் , அது நிரந்தரமாக வைக்கப்படவில்லை, வழிபாட்டு நிகழ்வுகள் முடிவடைந்ததும், அந்த புத்தர் சிலை மீள எடுத்து செல்லப்பட்டு விட்டதாக கூறப்பட்டுள்ளது.
அதன் பின்னர் அப்பகுதியில் கடமையில் இருந்த தொல்லியல் திணைக்களத்தினருடனும், தவிசாளர், அன்றைய சம்பவம் தொடர்பில் கேட்டறிந்ததுடன், பிரதேச சபையின் அனுமதிகள் இன்றி முன்னெடுக்கப்படும் செயற்பாடுகளுக்கு எதிராக நீதிமன்றின் ஊடாக சட்ட நடவடிக்கைகளை பிரதேச சபை எடுக்கும் என கூறியிருந்தார்.
