ஸ்வீடன், பெல்ஜியம், லக்சம்பர்க் மற்றும் அயர்லாந்து உள்ளிட்ட ஐரோப்பிய நாடுகளிலுள்ள சூப்பர் மார்க்கெட்களின் குளிர்சாதன (Refrigerators) மற்றும் பிரீசர் (Freezers) அமைப்புகளை இலக்கு வைத்து சைபர் தாக்குதல் நடத்தப்பட்டுள்ளது.
இந்தத் தாக்குதலால் குளிர்சாதனப் பெட்டிகளின் வெப்பநிலை உயர்ந்து, அதிகளவிலான உணவுப் பொருட்கள் வீணாகியுள்ளன.
அஹோல்ட் டெல்ஹைஸ் (Ahold Delhaize), கொல்ருய்ட் (Colruyt), ஐசிஏ (ICA), கோப் (Coop) மற்றும் ஐக்கியா (IKEA) ஆகிய பிரபல நிறுவனங்களின் வணிக நிலையங்கள் இதனால் பாதிக்கப்பட்டுள்ளன.
ஸ்வீடனின் ஸ்டாக்ஹோமில் உள்ள ஐசிஏ கடையில் அதிகாலை 2 மணிக்கு இந்தத் தாக்குதல் நடந்துள்ளது.
இதனால் பிரீசர்களின் வெப்பநிலை 50 டிகிரி செல்சியஸ் வரை உயர்ந்ததாக அதிகாரிகள் தெரிவித்துள்ளனர்.
இதேபோல, பெல்ஜியத்தில் உள்ள கொல்ருய்ட் குழுமத்தின் 5 கடைகளும், கேரிஃபோர் (Carrefour) நிறுவனத்தின் 15 கடைகளும் பாதிக்கப்பட்டுள்ளன.
அயர்லாந்தில் 13 சூப்பர்வேல்யூ (SuperValu) கடைகள் பாதிக்கப்பட்டு, உணவுப் பொருட்கள் விற்பனையிலிருந்து அகற்றப்பட்டுள்ளன.
கடந்த மாதம் பிரான்ஸ் நாட்டில் உள்ள நூற்றுக்கணக்கான சூப்பர் மார்க்கெட்களின் குளிர்சாதன அமைப்புகளை ஹேக்கர்கள் முடக்கியதைத் தொடர்ந்து தற்போது இந்தச் சம்பவம் நிகழ்ந்துள்ளது.
இந்தத் தாக்குதல்களுக்கு இதுவரை எந்தவொரு அமைப்பும் பொறுப்பேற்கவில்லை.
தொலைநிலையிலிருந்து கண்காணித்துச் செயல்படக்கூடிய டேன்பாஸ் (Danfoss) நிறுவனத்தின் வெப்பநிலை கட்டுப்பாட்டுத் தொழில்நுட்பத்தைப் பயன்படுத்திய கடைகளே இந்தத் தாக்குதலுக்கு இலக்காகியுள்ளன.
உணவு விநியோகச் சங்கிலியை சீர்குலைக்கவும், நுகர்வோரின் நம்பிக்கையைச் சீரழிக்கவும் திட்டமிட்டு நடத்தப்படும் இத்தகைய சைபர் தாக்குதல்கள் தீவிர கவலையளிப்பதாக ஐரோப்பிய ஆணையத்தின் விவசாய ஆணையர் கிறிஸ்டோஃப் ஹேன்சன் தெரிவித்துள்ளார்.
