உக்ரைனுக்கு சுமார் 2.1 பில்லியன் டாலர் மதிப்பிலான 500 பேட்ரியாட் பிஏசி-3 (Patriot PAC-3) ஏவுகணைகளை விற்பனை செய்ய ஒப்புதல் அளித்துள்ளதாக அமெரிக்க ராஜாங்கத் திணைக்களம் வெள்ளிக்கிழமை (30.10.2026) தெரிவித்துள்ளது.
இரண்டாவது டிரம்ப் நிர்வாகம் பதவியேற்றதில் இருந்து கியிவ் நகருக்குத் தற்காப்பு ஆயுதங்களை வழங்குவதற்காக எடுக்கப்பட்ட மிக முக்கியமான நடவடிக்கைகளில் ஒன்றாக இது பார்க்கப்படுகிறது.
ரஷ்யாவின் ஏவுகணைத் தாக்குதல்களை எதிர்கொள்ள உக்ரைனுக்கு ஏவுகணைத் தடுப்பான்கள் அவசியமாகத் தேவைப்படும் நிலையில், இந்த விற்பனை அறிவிப்பு வெளியாகியுள்ளது.
வியாழக்கிழமை (29.10.2026) உக்ரைனின் நிப்ரோ (Dnipro) நகரில் உள்ள இரயில் நிலையத்தில் ரஷ்யா நடத்திய ட்ரோன் தாக்குதலில் 14 பேர் உயிரிழந்தனர்.
மேலும் இரு நகரங்களில் நடத்தப்பட்ட தாக்குதல்களில் 5 பேரும், தலைநகர் கியிவில் நடத்தப்பட்ட ஏவுகணைத் தாக்குதலில் ஒருவரும் உயிரிழந்தனர்.
முக்கிய ஏவுகணைகளின் விநியோகத்திற்காக உக்ரைன் ஒரு மாத காலமாக அமெரிக்காவின் ஒப்புதலுக்குக் காத்திருப்பதாக உக்ரைனிய அதிபர் வோலோடிமிர் ஜெலென்ஸ்கி திங்கட்கிழமை (26.10.2026) தெரிவித்திருந்தார்.
இருப்பினும், இந்த ஏவுகணைகள் உக்ரைனுக்கு உடனடியாகக் கிடைக்க வாய்ப்பில்லை எனக் கூறப்படுகிறது.
இனிமேல் உற்பத்தி செய்யப்பட வேண்டிய இந்த ஏவுகணைகள் 2030 ஆம் ஆண்டுகளின் தொடக்கத்திலேயே உக்ரைனுக்கு விநியோகிக்கப்படும் என எதிர்பார்க்கப்படுகிறது.
இதனால், அமெரிக்கப் படைகளிடம் ஏற்கனவே உள்ள ஏவுகணைகளை உக்ரைனுக்கு வழங்கிவிட்டு, புதிதாக உற்பத்தியாகும் ஏவுகணைகளை அமெரிக்காவிற்குப் பயன்படுத்திக் கொள்ளுமாறு உக்ரைன் பாதுகாப்பு அமைச்சு அமெரிக்காவிடம் வலியுறுத்தி வருகிறது.
கனடா, ஜெர்மனி மற்றும் நோர்வே ஆகிய நாடுகளின் நிதியுதவி மற்றும் ஐரோப்பிய ஒன்றியத்தின் கடன் உதவி மூலம் உக்ரைன் இந்த ஏவுகணைகளுக்கான கட்டணத்தைச் செலுத்தும் எனத் தெரிவிக்கப்பட்டுள்ளது.
லாக்ஹீட் மார்ட்டின் (Lockheed Martin) நிறுவனம் இந்த ஏவுகணைகளை உற்பத்தி செய்வதற்கான முக்கிய ஒப்பந்ததாரராகச் செயல்படவுள்ளது.
