கனமழையால் பிரதான சாலை சேதமடைந்து, சுமார் 300 மக்கள் தங்கள் சமூகத்துடன் நேரடித் தொடர்பை இழந்துள்ள நிலையில், சீரமைப்புப் பணிகள் தாமதமடைவது கியூபெக்கின் ல’அசென்ஷன் நகராட்சியில் பெரும் கவலையை ஏற்படுத்தியுள்ளது.
கடந்த ஆகஸ்ட் 3ஆம் திகதி பெய்த கனமழையினால், ல’அசென்ஷன் நகராட்சியை அண்டை நகரமான ரிவியர்-ரூஜுடன் இணைக்கும் பிரின்சிபால் தெரு மற்றும் டி ல’அசென்ஷன் சாலையின் சில பகுதிகள் வெள்ளத்தில் அடித்துச் செல்லப்பட்டன.
இதனால், சுமார் 45 அடி ஆழமும் 70 அடி அகலமும் கொண்ட பாரிய பள்ளம் உருவாகியுள்ளது. நகரின் மக்கள் தொகையில் சுமார் 30 சதவீதத்தினர், அதாவது 300 பேர், இந்தப் பாதிப்பினால் நேரடியாகப் பாதிக்கப்பட்டுள்ளனர்.
சாலையைச் சீரமைப்பதற்கான ஒப்பந்தக்காரர், பொறியியல் திட்டங்கள் மற்றும் மாற்று வடிகால் வசதிகள் தயாராக உள்ளதாக நகர மேயர் ஜாக் அலார்ட் தெரிவித்துள்ளார். எனினும், கியூபெக் அரசாங்கத்தின் அனுமதி மற்றும் நிதியுதவிக்கான உறுதிப்படுத்தல் கிடைக்காததால், பணிகளை ஆரம்பிக்க முடியாத நிலை ஏற்பட்டுள்ளதாக அவர் சுட்டிக்காட்டியுள்ளார்.
சீரமைப்புப் பணிகளை நிறைவு செய்ய சுமார் ஐந்து வாரங்கள் தேவைப்படும் என்றும், இதற்காக மூன்று மில்லியன் டொலர் செலவாகும் என்றும் எதிர்பார்க்கப்படுகிறது.
இதற்கிடையில், போக்குவரத்துத் தடையால் உள்ளூர் வணிகங்களும் பாதிக்கப்பட்டுள்ளன. அப்பகுதியில் மளிகைக் கடை நடத்திவரும் நிக்கோலஸ் கோட்டே, கடந்த ஆண்டுடன் ஒப்பிடுகையில் தனது வியாபாரம் 15 சதவீதம் குறைந்துள்ளதாகத் தெரிவித்துள்ளார்.
பாதிக்கப்பட்ட பகுதி மக்களுக்கு அருகிலுள்ள ரிவியர்-ரூஜ் நகரத்திற்குச் செல்ல வேண்டிய நிலை ஏற்பட்டுள்ளதுடன், சிலர் தங்களது உள்ளூர் மளிகைக் கடையைச் சென்றடைய ஒரு மணி நேரத்திற்கும் மேலாக மாற்றுப்பாதையில் பயணிக்க வேண்டியுள்ளது.
குளிர்காலம் நெருங்குவதால், பனியை அகற்றும் பணிகள் மற்றும் கனரக வாகனங்களின் மாற்றுப்பாதைப் பயணங்களுக்கான செலவுகள் அதிகரிக்கலாம் என நகர மேயர் கவலை வெளியிட்டுள்ளார்.
இதனிடையே, இயற்கைப் பேரிடர்களால் பாதிக்கப்பட்ட நகராட்சிகளுக்கான நிதியுதவித் திட்டத்தின் கீழ் இந்தச் சீரமைப்புப் பணிகளுக்கு உதவி வழங்கப்படுமா என்பது குறித்து கியூபெக் அரசாங்கம் பரிசீலித்து வருவதாகத் தெரிவித்துள்ளது.
சாலைத் தொடர்பை மீண்டும் ஏற்படுத்துவதற்கான நடவடிக்கைகள் தாமதமடைவது, அப்பகுதி மக்களின் அன்றாட வாழ்க்கையையும் உள்ளூர் பொருளாதாரத்தையும் தொடர்ந்து பாதித்து வருகின்றது.
